ट्रम्पले भारतलाई अमेरिकाको मित्र राष्ट्र भए पनि भारतको चर्को भन्सार शुल्कका कारण व्यापारमा कमी आएको उल्लेख गरेका छन्। यसका साथै, ट्रम्पले भारत र रुसबीचको सम्बन्धप्रति पनि असन्तुष्टि व्यक्त गरेका छन्। भारतले रुससँग निरन्तर हतियार र ऊर्जा खरिद गरिरहेकोमा उनले आपत्ति जनाएका छन्। युक्रेनमा युद्ध रोक्न रुसमाथि दबाब दिइरहेका बेला भारतले त्यसैसँग व्यापार गरिरहेकोमा ट्रम्पले गुनासो गरेका छन्। उनले रुसबाट तेल र हतियार किन्ने कार्यलाई लिएर भारतमाथि अस्पष्ट अतिरिक्त कारबाही पनि गरिने चेतावनी दिएका छन्।

यसैबीच, भारतले भने निष्पक्ष, सन्तुलित र आपसी हितमा आधारित द्विपक्षीय व्यापार सम्झौता गर्न प्रतिबद्ध रहेको प्रतिक्रिया दिएको छ।

ट्रम्पले यसअघि अप्रिलमा भारतबाट आयात हुने केही वस्तुहरूमा २७ प्रतिशतसम्म भन्सार लगाउने घोषणा गरेका थिए, जुन पछि केही समयका लागि रोकिएको थियो। तर, अब उनले फेरि व्यापार सम्झौता नभए थप महसुल लगाउने चेतावनी दिएका छन्।

सन् २०२४ मा अमेरिका र भारतबीच १९० अर्ब डलरको व्यापार भएको थियो, जसमा अमेरिका करिब ४५ अर्ब डलर घाटामा रहेको तथ्यांक छ। यो नयाँ शुल्क घोषणाले दुई देशबीचको व्यापार सम्बन्धमा थप जटिलता ल्याउने देखिएको छ।