काठमाडाैं, २७ असार । अमेरिकी अदालतले पूर्वराष्ट्रपति डोनाल्ड ट्रम्पले जारी गरेको जन्मसिद्ध नागरिकतासम्बन्धी कार्यकारी आदेशमा अस्थायी रोक लगाएको छ। अदालतको यस निर्णयसँगै उक्त आदेश लागू भएको भए अमेरिकामा जन्मिने हजारौं बालबालिका जन्मसिद्ध नागरिकताको अधिकारबाट वञ्चित हुने खतरा टरेको छ।

ट्रम्पले २० जनवरी २०२५ मा हस्ताक्षर गरेको उक्त आदेश ‘प्रोटेक्टिङ द मिनिङ एण्ड भ्यालु अफ अमेरिकन सिटिजनसीप’ (Protecting the Meaning and Value of American Citizenship) शीर्षकमा सार्वजनिक गरिएको थियो। यस आदेशमा नागरिकता प्रदान गर्ने सर्तहरू कडा बनाउने प्रस्ताव गरिएको थियो। विशेषतः अवैध आप्रवासी आमाबाट जन्मिएका, अस्थायी बसोबासको स्थिति भएका वा पिताको कानुनी हैसियत अमेरिकामा नपुगेका अवस्थामा बच्चाले नागरिकता नपाउने व्यवस्था ट्रम्पको आदेशमा गरिएको थियो।

तर, अमेरिकी संविधानको १४औँ संशोधनले जन्मसिद्ध नागरिकता सुनिश्चित गरेको प्रावधानको आधारमा यो आदेश संविधानविपरीत रहेको ठहर गर्दै अदालतले अस्थायी रोक लगाएको हो। अदालतले ट्रम्प प्रशासनलाई ७ दिनभित्र अपिल गर्न समय दिएको छ भने निर्णयको लिखित प्रतिलिपि चाँडै सार्वजनिक गरिने बताइएको छ। यस निर्णयले अमेरिकाको नागरिकता कानुनमा महत्वपूर्ण प्रभाव पार्ने देखिएको छ।