काठमाडाैं, ३२ असार । चितवनस्थित कृषि तथा वन विज्ञान विश्वविद्यालयको १४औं सिनेट बैठकले आगामी आर्थिक वर्ष २०८२/८३ का लागि १ अर्ब ६८ करोड रुपैयाँको बजेट अनुमोदन गरेको छ। प्रधानमन्त्री तथा विश्वविद्यालयका कुलपति केपी शर्मा ओलीको अध्यक्षतामा आज बालुवाटारस्थित उनको सरकारी निवासमा बसेको सिनेट बैठकले विश्वविद्यालयको प्रस्तावित बजेट र वार्षिक कार्यक्रमहरू स्वीकृत गरेको हो।

विश्वविद्यालयका रजिस्ट्रार प्रा. डा. पुष्कर बहादुर पालले सिनेटको विचारका लागि बजेट र कार्यक्रमहरू प्रस्तुत गरेका थिए। बैठकमा विश्वविद्यालयका उपकुलपति प्रा. डा. शारदा थापाले शिक्षण सिकाइ गतिविधि, अनुसन्धान र परीक्षा प्रणालीमा गुणस्तर सुनिश्चित गर्नका साथै व्यवसायिक इन्क्युबेशन सेन्टर स्थापना गर्नेतर्फ विश्वविद्यालयका पहलहरूमा जोड दिएका थिए।

कुलपति रहेका प्रधानमन्त्री ओलीले नयाँ आर्थिक वर्ष साउन १ गतेदेखि सुरु हुनुअघि सबै विश्वविद्यालय र स्वास्थ्य प्रतिष्ठानहरूको प्रस्तावित बजेट र कार्यक्रमहरू बैठकबाट स्वीकृत गर्न निर्देशन दिएपछि देशभरका विश्वविद्यालय र स्वास्थ्य प्रतिष्ठानहरूको सिनेट बैठकहरू छोटो सूचनामा बस्न थालेका छन्। आज मात्रै चारवटा विश्वविद्यालय र स्वास्थ्य प्रतिष्ठानहरूको सिनेट बैठक सम्पन्न भएका छन् भने थप दुईवटा बैठक आगामी बुधबारका लागि तय भएका छन्।