मन्त्री देउवाले भनिन्, “पार्टी व्यक्तिगत महत्त्वाकांक्षा पूरा गर्ने मञ्च होइन, यो राष्ट्र र समाजको सेवा गर्ने ठाउँ हो।” उनले बीपी कोइराला, गणेशमान सिंह र कृष्णप्रसाद भट्टराईजस्ता संस्थापक नेताहरूको अमूल्य योगदानको स्मरण गर्दै उनीहरूका मार्गदर्शक सिद्धान्तहरू पालना गर्नुको महत्त्वमाथि प्रकाश पारिन्। “हामी उहाँहरूकै मार्गदर्शनलाई ध्यानमा राखेर अगाडि बढ्नु महत्त्वपूर्ण छ। यदि हामी प्रत्येकले हाम्रा शब्द र कार्यले कसरी पार्टीलाई बलियो बनाउन सक्छ भन्नेमा ध्यान दियौँ भने हामीले सामूहिक रूपमा यसलाई अझ बलियो बनाउनेछौँ,” उनले भनिन्।

आगामी १५औँ महाधिवेशनलाई लक्षित गर्दै उनले आन्तरिक प्रतिस्पर्धाले पार्टीलाई बलियो बनाउन सक्ने विश्वास व्यक्त गरिन् – तर यसका लागि कसैलाई पनि पाखा नलगाइ एकता कायम राख्नुपर्ने उनको भनाइ थियो।

डा. देउवाले नयाँ राजनीतिक दलहरूले सामाजिक सञ्जालको प्रभावकारी रूपमा प्रयोग गरिरहेको बताउँदै नेपाली कांग्रेसले पनि सकारात्मक र ऊर्जावान तरिकाले सामाजिक सञ्जालको उपयोग गरी जनतासँग जोडिनुपर्नेमा जोड दिइन्।

उनले ‘देशमा केही भइरहेको छैन’ भन्ने नकारात्मक भाष्य फैलाउने प्रयास भइरहेको भन्दै युवाहरूलाई बसाइँसराइको प्रवृत्तिलाई त्यागेर सकारात्मक सन्देशका साथ राष्ट्र निर्माणमा योगदान गर्न आग्रह गरिन्।

गण्डकी प्रदेश नेपाली कांग्रेसका सभापति शुक्रराज शर्माले पनि मन्त्री देउवाको भनाइमा सहमति जनाउँदै पार्टी राष्ट्रवाद, प्रजातन्त्र र समाजवादका आधारभूत मूल्यमान्यताप्रति प्रतिबद्ध रहनुपर्ने बताए। उनले एकता अपरिहार्य रहेको र गुटबन्दीबाट बच्नुपर्नेमा जोड दिए।

कास्की जिल्लाका सभापति किशोरदत्त बरालले पनि नेपाली कांग्रेस कुनै पनि राष्ट्रिय चुनौतीलाई पार लगाउन र बलियो भएर अगाडि बढ्न सक्ने पार्टी भएको बताए।