बैठकमा चालू आर्थिक वर्षको बजेटमा समावेश भएका मन्त्रालयगत योजना तथा कार्यक्रमहरूको कार्यान्वयनका लागि आवश्यक कानुनी, प्रक्रियागत र व्यवहारिक तयारी थाल्ने विषयमा केन्द्रित रहेर कुराकानी भएको थियो। छलफलमा विशेषगरी दलित समुदायको परम्परागत सीप र पेशाको संरक्षण गर्दै रोजगारी र आयआर्जनका अवसर सिर्जना गर्ने उद्देश्यले ल्याइएको भगत सर्वजित उद्यमशीलता विकास कार्यक्रम लाई कार्यान्वयनमा ल्याउने विषयमा जोड दिइएको छ। यसअन्तर्गत आधुनिक प्रविधिको हस्तान्तरण, तालिम र उत्पादित वस्तुलाई बजारसँग जोडेर अघि बढ्ने योजना रहेको छ।

त्यसैगरी, काठमाडौं उपत्यकाको प्रदूषण नियन्त्रण गर्नका लागि उपत्यकाभित्रका उद्योगहरूलाई बाहिरका औद्योगिक क्षेत्रमा स्थानान्तरण गर्ने र यस्ता उद्योगहरूलाई विशेष सहुलियत दिनेबारे पनि छलफल भएको छ। बैठकमा भारत र चीन लगायतका अन्तर्राष्ट्रिय समुदायले मान्यता दिने गरी नेपालमा अन्तर्राष्ट्रिय स्तरको गुणस्तर प्रयोगशाला स्थापना गर्ने विषयमा पनि कुराकानी भएको छ। यसका साथै, मकवानपुरको मयूरधाप र चितवनको शक्तिखोरमा आधुनिक औद्योगिक क्षेत्रको निर्माण गर्ने विषयमा पनि छलफल भएको छ।

उक्त बैठकमा अर्थमन्त्री पौडेल र उद्योग, वाणिज्य तथा आपूर्ति मन्त्री दामोदर भण्डारीका साथै अर्थ सचिव घनश्याम उपाध्याय, राजस्व सचिव दिनेशकुमार घिमिरे र उद्योग सचिव डा. रामप्रसाद घिमिरे लगायतको उपस्थिति थियो। अर्थ मन्त्रालयले चालू आर्थिक वर्षको बजेटलाई प्रभावकारी रूपमा कार्यान्वयन गर्नका लागि सबै मन्त्रालय र विभागहरूसँग क्रमशः छलफल गर्ने कार्यक्रम तय गरेको छ।