वैशाख २७ गतेदेखि नै रास्वपा र राप्रपाले भिजिट भिसाको दुरुपयोगका विषयमा विस्तृत छानबिनको माग गर्दै संसदमा विरोध प्रदर्शन गर्दै आएका छन्। बुधबारको बैठकमा पनि रास्वपाका प्रवक्ता तथा सांसद मनिष झा र राप्रपाकी सांसद रोशन कार्कीले आफ्ना मागहरू राखेर संसद भवनबाट बाहिरिएका थिए।

सांसद झाले सरकारलाई भिसा सम्बन्धी मुद्दामा उदासीन रहेको भन्दै आलोचना गरे। उनले ‘कुलिङ-अफ पिरियड’ विवादमा भएको प्रक्रियागत गडबडीका लागि खातिवडा जिम्मेवार रहेको आरोप लगाए। “हाम्रो नैतिकता र क्षमतामाथि बारम्बार प्रश्न उठाइएको छ। अहिले राज्य व्यवस्था समितिका सभापतिमाथि नै नैतिक प्रश्न उठिरहेको छ,” झाले भने, “यसअघि यस्ता प्रतिवेदनहरू आउँदा हामीलाई नैतिक आधारमा सोधपुछ गरिएको थियो। अहिले यो गैरजिम्मेवारीको जवाफ कसले दिने?”

उनले खातिवडाको प्रत्यक्ष संलग्नताका कारण समिति सभापतिको पदमा रहिरहनु उचित नभएको बताए। “जवाफदेहीता अनिवार्य हो। हामीले हाम्रो आन्दोलनको एजेन्डामा राज्य व्यवस्था समितिका सभापतिको राजीनामालाई पनि थपेका छौं,” झाले थपे।

राप्रपाकी सांसद रोशन कार्कीले सांसदहरू विरोधमा रहेका बेला पनि संसदीय बैठक चलाइरहनुको वैधानिकतामाथि प्रश्न उठाइन्। उनले सभामुखलाई सोधिन्, “के सरकार संसदप्रति जवाफदेही छ, वा संसद सरकारप्रति?” दुवै दलका सांसदहरूले आन्दोलन जारी रहने सङ्केत गर्दै आफ्ना मागहरू पूरा नभएसम्म विरोध जारी रहने बताएका छन्।