बुधबार ह्वाइट हाउसमा पत्रकारहरूसँग कुरा गर्दै ट्रम्पले आफ्ना विशेष दूत स्टीभ विटकोफ र रुसी राष्ट्रपति पुटिनबीच भएको छलफल धेरै सकारात्मक रहेको जानकारी दिए। उनले आफू दुवै नेतासँग वार्ता गर्न तयार रहेको पनि स्पष्ट पारेका छन्। क्रेमलिनले पनि सो भेटवार्तालाई रचनात्मक भन्दै दुई पक्षबीच महत्त्वपूर्ण सन्देशहरू आदानप्रदान भएको जनाएको छ, यद्यपि विस्तृत विवरण भने सार्वजनिक गरिएको छैन।

यो भेटवार्ता ट्रम्पले रुसलाई युद्ध रोक्नका लागि अन्तिम म्याद दिएको केही दिनअघि भएको हो। ट्रम्पले आफ्ना युरोपेली साझेदारहरूसँग पनि यस विषयमा छलफल गरेको भन्दै आफ्नो सोसल मिडिया प्लेटफर्ममा पोस्ट गरेका छन्। उनले लेखेका छन्, “सबै सहमत छन् — यो युद्ध अन्त्य हुनुपर्छ, र हामी यसतर्फ काम गरिरहनेछौं।”

यसैबीच, युक्रेनी राष्ट्रपति जेलेन्स्कीले पनि ट्रम्पसँग विटकोफको रुस भ्रमणबारे टेलिफोन वार्ता भएको पुष्टि गरेका छन्। जेलेन्स्कीले रुसले शान्तिका लागि गम्भीर पहल गर्ने हो भने उसले आर्थिक दबाबमा पर्नुपर्ने आवश्यकतामा जोड दिँदै आएका छन्। यदि रुसले युद्ध अन्त्यतर्फ ठोस कदम नचालेमा ट्रम्प प्रशासनले कडा प्रतिबन्ध र रुससँग व्यापार गर्नेहरूमाथि समेत थप प्रतिबन्ध लगाउने चेतावनी दिएको छ।