व्यापार र यात्रु संख्यामा वृद्धि

आर्थिक वर्ष २०२४-२५ को पहिलो ९ महिनामा कम्पनीले ४ अर्ब ११ करोड ७० लाख रुपैयाँको व्यापार गरेको छ, जुन अघिल्लो आर्थिक वर्ष २०२४ को ४ अर्ब २५ करोड ८० लाखको कुल व्यापारको नजिक पुगेको छ। सन् २०२१ देखि हालसम्म कम्पनीको कुल व्यापार १७ अर्ब ४६ करोड ६० लाख रुपैयाँ पुगेको छ।

पोखरामा भएको विमान दुर्घटनापछि सन् २०२३ मा १७ प्रतिशतमा झरेको कम्पनीको बजार हिस्सा सन् २०२४ मा बढेर २१ प्रतिशत पुगेको छ। यात्रु भर्ना दर (occupancy rate) पनि २०२३ को ७८ प्रतिशतबाट बढेर २०२४ मा ८२ प्रतिशत पुगेको छ।

नयाँ विमान र सेवा विस्तार

कम्पनीले सन् २०२४ मा थप दुई नयाँ एटीआर ७२ विमान सञ्चालनमा ल्याएको छ, जसले व्यापार विस्तारमा महत्वपूर्ण भूमिका खेलेको छ। यी विमान खरिदका लागि करिब १ अर्ब ७० करोड रुपैयाँ लगानी गरिएको थियो। हाल यति एयरलाइन्ससँग कुल ७ वटा विमान छन्, जसमध्ये ६ वटा आफ्नै स्वामित्वमा छन्।

यससँगै, कम्पनीले आफ्नो सेवा १६ वटा मार्गबाट विस्तार गरी २० वटा मार्गमा पुर्याएको छ। यद्यपि, कम्पनीको आम्दानीको ४७ प्रतिशत हिस्सा अझै पनि काठमाडौं-पोखरा, पोखरा-काठमाडौं र काठमाडौं-विराटनगर गरी चार प्रमुख मार्गबाट आउने गरेको छ।

नाफामा व्यापक सुधार र क्रेडिट रेटिङ

सन् २०२४ मा कुल कारोबारको २ प्रतिशत रहेको नाफा दर सन् २०२५ को पहिलो ९ महिनामा बढेर ५.४७ प्रतिशत पुगेको छ। पछिल्ला तीन वर्षमा यात्रु संख्या १४ प्रतिशत र कुल कारोबार २७ प्रतिशतले बढेको छ।

कम्पनीले आफ्नो विस्तारका लागि आवश्यक पर्ने ऋणका लागि रेटिङ गराएको छ। इनफोमेरिक्स क्रेडिट रेटिङ नेपालले कम्पनीलाई दीर्घकालीन ऋणका लागि ‘Triple B minus’ र अल्पकालीन ऋणका लागि ‘A3’ को रेटिङ दिएको छ। कम्पनीले हालसम्म ६ अर्ब ३६ करोड १६ लाख रुपैयाँ र २ करोड ७१ लाख अमेरिकी डलर बराबरको ऋणका लागि रेटिङ गराएको छ।

कम्पनीमा शेर्पा समूहको ५१ प्रतिशत र एसियन लाइफको ४९ प्रतिशत सेयर स्वामित्व रहेको छ। यति एयरलाइन्स हाल आन्तरिक हवाई बजारमा दोस्रो ठूलो सेवा प्रदायकको रूपमा रहेको छ।