मन्त्री खड्काले ऊर्जा क्षेत्रलाई मुलुकको आर्थिक मेरुदण्डको रूपमा लिएको र यसलाई तीव्रता दिन सरकारले १० वर्षका लागि विकासको खाका तयार गरेको बताए। यो खाका पूरा गर्न ग्रिड कम्पनीको भूमिका महत्वपूर्ण हुने उनको भनाइ थियो। उनले ऊर्जा क्षेत्रको विकासका लागि निजी क्षेत्रलाई प्रमुख सहयात्री मानेर अगाडि बढिरहेको र यस क्षेत्रमा देखिएका कानुनी तथा वित्तीय जटिलतालाई समाधान गर्दै जाने प्रतिबद्धता व्यक्त गरे।

अन्य पदाधिकारीका भनाइ

• विद्युत नियमन आयोगका अध्यक्ष डा. रामप्रसाद धितालले प्रसारण प्रणालीमा खुला पहुँच सुनिश्चित गर्न सरकार प्रतिबद्ध रहेको र आयोगले प्रसारण लाइनमा ह्वीलिङ शुल्क निर्धारणको काम गरिरहेको जानकारी दिए।
• ऊर्जा सचिव तथा ग्रिड कम्पनीका अध्यक्ष सुरेश आचार्यले ग्रिड कम्पनीलाई देशको समग्र प्रसारण प्रणाली निर्माण, विकास र सञ्चालनमा नेतृत्वदायी संस्थाका रूपमा विकास गर्नुपर्नेमा जोड दिए।
• लगानी बोर्डका कार्यकारी निर्देशक सुशील ज्ञवाली र नेपाल विद्युत प्राधिकरणका कार्यकारी निर्देशक हितेन्द्रदेव शाक्यले ऊर्जा क्षेत्रको विकासका लागि तीनै तहका सरकारबीच समन्वय हुनुपर्नेमा जोड दिए।

• ग्रिड कम्पनीका प्रमुख कार्यकारी अधिकृत सागर श्रेष्ठले आगामी १० वर्षमा प्रसारण पूर्वाधारलाई सुदृढ बनाउँदै लैजाने बताए। हाल कम्पनीले ११ वटा प्रसारण आयोजनालाई विभिन्न चरणमा अगाडि बढाएको छ।