राज्य विभागका अनुसार, रद्द गरिएकामध्ये करिब ४,००० भिसा कानून उल्लंघनका कारण रद्द भएका हुन् भने २००–३०० भिसा आतंकवादी गतिविधि वा अमेरिकी कानूनको गम्भीर उल्लंघनमा संलग्न भएका कारण रद्द गरिएका छन्।

ट्रम्प प्रशासनले गाजामा जारी युद्धको विरोधमा प्रदर्शन गर्ने विद्यार्थीहरूलाई विशेषगरी लक्षित गर्दै उनीहरूलाई यहुदी विरोधी र आतंकवादको समर्थकको आरोपमा भिसा रद्द गर्दै आएको छ।

राज्य विभागले हालै आफ्ना दूतावास र कन्सुलेटहरूलाई नयाँ भिसा आवेदनकर्ताहरूको सामाजिक सञ्जालको प्रोफाइल जाँच गर्न कडा निर्देशन दिएको छ। यदि कुनै आवेदकले आफ्नो सामाजिक सञ्जाल प्रोफाइल गोप्य राखेमा त्यसलाई “गोप्य गतिविधि लुकाउने प्रयास” को रूपमा लिइने चेतावनी दिइएको छ।

विदेश मन्त्री मार्को रुबियोले यस नीतिको बचाउ गर्दै भने, “विद्यार्थी भिसा कुनै संवैधानिक अधिकार होइन। यदि हामीलाई तपाईंको बारेमा पहिले नै थाहा भएको भए भिसा अस्वीकार गर्ने थियौं भने पछि थाहा पाएपछि भिसा रद्द गर्नु किन नहुने?”

यस नीतिको प्रत्यक्ष प्रभाव अमेरिकी शैक्षिक र आर्थिक क्षेत्रमा पर्ने अनुमान गरिएको छ। नयाँ विद्यार्थी भर्नामा ३०–४० प्रतिशतले गिरावट आउन सक्ने र यसले यस सिजनमा कुल विद्यार्थी संख्यामा १५ प्रतिशतले कमी ल्याउने विश्लेषण गरिएको छ। यसबाट अमेरिकी अर्थतन्त्रलाई करिब ७ अर्ब डलरको क्षति पुग्ने र ६० हजारभन्दा बढी रोजगारी जोखिममा पर्ने अनुमान छ। यदि भिसा वितरणको प्रक्रियामा सुधार भएन भने, यस वर्ष १ लाख ५० हजार विद्यार्थी अमेरिका आउनबाट वञ्चित हुनेछन्।