विज्ञप्तिमा सन् २०१५ मा पनि यस्तै सहमति भएको र त्यसबेला नेपाल सरकारले कूटनीतिक असहमति जनाउँदै दुवै मुलुकलाई औपचारिक नोट पठाएको स्मरण गराइएको छ। त्यसबेला नेपालको स्पष्ट आपत्ति हुँदाहुँदै पनि भारत र चीनले पुनः त्यही गल्ती दोहोर्‍याउनु छिमेकी मुलुकहरूको हेपाहा प्रवृत्तिको प्रतिबिम्ब भएको नयाँ शक्तिले ठहर गरेको छ।

पार्टीले यस एकपक्षीय कदमलाई अस्वीकार गर्दै नेपाल सरकारको कूटनीतिक सक्रियता र दृढतामा देखिएको कमजोरीले राष्ट्रिय हितको संवेदनशील प्रश्नलाई थप जटिल बनाएको आरोप लगाएको छ।

नयाँ शक्तिले सीमा विवाद र कूटनीतिक विषयहरूको समाधानका लागि नेपालले थप प्रभावकारी र परिणाममुखी कूटनीतिक पहल गर्नुपर्नेमा जोड दिएको छ। विज्ञप्तिमा नेपालले आफ्नो राष्ट्रिय स्वार्थलाई केन्द्रमा राख्दै भारत-चीन-नेपालबीच समानता, आपसी सम्मान र विश्वासमा आधारित त्रिदेशीय सहकार्यको ढाँचा निर्माण गर्नु जरुरी रहेको पनि उल्लेख गरिएको छ।