किसानहरूका अनुसार, दूध बिक्री गरेको लामो समय बित्दा पनि भुक्तानी नपाउँदा उनीहरूलाई परिवारको पालनपोषण, छोराछोरीको शिक्षा र पशुपालनमा समेत आर्थिक समस्या परेको छ। यसअघि पटकपटक ध्यानाकर्षण गराउँदा पनि सम्बन्धित निकायबाट कुनै सुनुवाइ नभएपछि बाध्य भएर आन्दोलनमा उत्रिनुपरेको उनीहरूको भनाइ छ।

उखु किसान पनि आन्दोलित

यसैबीच, सरकारले उखु किसानलाई दिँदै आएको अनुदान रकम घटाएपछि उखु किसानहरूले पनि आन्दोलनलाई थप चर्काउने घोषणा गरेका छन्। बजेट अभाव देखाउँदै सरकारले प्रतिक्विन्टल ७० रुपैयाँबाट अनुदान रकम घटाएर ३५ रुपैयाँमा झारेको छ। यसको विरोधमा काठमाडौंको माइतीघरमा प्रदर्शन गरिरहेका उखु किसानहरूले अब राजमार्ग केन्द्रित आन्दोलन गर्ने बताएका छन्।