राष्ट्रपति पौडेल बिहान ११ बजे भृकुटीमण्डपस्थित राष्ट्रिय सभागृहमा आयोजित मानव अंग प्रत्यारोपणसम्बन्धी कार्यक्रममा सहभागी हुन गएका थिए। उनी शीतल निवासबाट १०:४५ मा निस्किएर १५ मिनेटभित्र भृकुटीमण्डप पुग्ने तालिका रहेको थियो। यसका कारण महाराजगञ्ज-रत्नपार्क सडक खण्डमा अन्य सवारीसाधनलाई रोक लगाइएको थियो।

राष्ट्रपति पौडेलले भक्तपुरस्थित शहीद धर्मभक्त राष्ट्रिय प्रत्यारोपण केन्द्रद्वारा आयोजित कार्यक्रममा मिर्गौला प्रत्यारोपण गरेका १५ सय बिरामी र चिकित्सकलाई सम्मान गरेका छन्। उनी १२ बजे शीतल निवास फर्किएका छन्।

यता, माइतीघर मण्डलामा जेनजी प्रदर्शनकारीहरूको संख्या निरन्तर बढिरहेको छ। प्रदर्शनका कारण माइतीघर-नयाँ बानेश्वर सडक खण्डमा ट्राफिक प्रहरीले सवारीसाधनलाई वैकल्पिक मार्गबाट पठाउने तयारी गरेको छ। प्रहरी स्रोतका अनुसार, राष्ट्रपति र जेनजी प्रदर्शनका कारण उपत्यकाभरिको ट्राफिक व्यवस्थापन प्रभावित भएको छ। प्रदर्शनमा स्ट्यान्डबाइ राखिएका प्रहरीहरूलाई राष्ट्रपतिको सवारीका लागि समेत खटाइएको थियो।