एक विज्ञप्ति जारी गर्दै डा. भट्टराईले केही व्यक्तिले भनेजस्तो देश संविधानविहीन अवस्थामा नपुगेको स्पष्ट पारेका छन्। ‘सरकारले राजीनामा गरे पनि लोकतन्त्रका आधारभूत अंगहरू संविधान, संसद, राष्ट्राध्यक्ष (राष्ट्रपति–उपराष्ट्रपति) र राज्यका स्थायी अंगहरू यथावत् छन्,’ उनले भनेका छन्, ‘यी संस्थाहरूलाई टेकेर नै अघि बढ्न नयाँ नेपालका अगुवा जेनजीहरू चुक्नुहुन्न।’

उनका अनुसार अहिलेको सबैभन्दा जरुरी विषय आन्दोलनमा उठेका मागहरूको सम्बोधन र शीघ्र आम निर्वाचन हो। त्यसका लागि आन्दोलनकारीसमेतको सिफारिस र सहभागितामा अन्तरिम सरकार गठन गर्नुपर्ने उनको सुझाव छ। डा. भट्टराईले यो कदम वर्तमान संविधानको परिधिभित्र रहेर मात्रै चाल्नुपर्नेमा जोड दिएका छन्। अन्यथा, ठूलो अनिष्ट हुन सक्ने उनको भनाइ छ।

https://www.facebook.com/share/19SCqcEkWY/