गत भदौ २३ र २४ गते भएको जेनजी आन्दोलनका क्रममा ७४ जनाको मृत्यु भएको थियो, जसमा अधिकांशलाई टाउको र छातीमा गोली लागेको थियो। ओलीले प्रहरीसँग नभएका स्वचालित हतियारबाट गोली प्रहार भएको दाबी गर्दै त्यसको छानबिन हुनुपर्नेमा जोड दिए।

उनले आफ्नो वक्तव्यमा संविधानको महत्त्व र नेपाली जनताले गरेको सङ्घर्षको पनि चर्चा गरेका छन्। ‘संविधान २०७२ नेपाली जनताले आफैँले सङ्घर्ष गरेर प्राप्त गरेका उपलब्धि हो,’ उनले भने, ‘यो संविधान लोकतान्त्रिक गणतन्त्र, सङ्घीय समावेशी व्यवस्था र जनताका अधिकार स्थापित गर्ने माइलस्टोन हो।’

ओलीले संविधान जारी भएपछि नेपाललाई भूपरिवेष्ठितबाट भूजडित बनाउनका लागि उत्तर र दक्षिणका छिमेकी मुलुकसँग यातायात पारवहन सम्झौता गरिएको स्मरण गर्दै मुलुकको सार्वभौमसत्ता र विकासको जग बसालिएको बताएका छन्।

उनले जेनजी आन्दोलनमा घुसपैठ भएको र षड्यन्त्रकारीहरूले हिंसा मच्चाएर युवाहरूको ज्यान गएको आरोप लगाएका छन्। ओलीले आफ्नो राजीनामापछि सिंहदरबार र नेपालको नक्सा जलाइएको, जनप्रतिनिधि संस्था, अदालत, व्यापारिक प्रतिष्ठान र राजनीतिक दलका कार्यालयमा क्षति पुर्‍याइएको उल्लेख गर्दै यसको पछाडिको षड्यन्त्रबारे समयले नै खुलासा गर्ने बताएका छन्।

वक्तव्यको अन्त्यमा उनले सबै पुस्ताका नेपालीलाई एकजुट भएर संविधान र सार्वभौमसत्ताको रक्षा गर्न आग्रह गरेका छन्।