काठमाडाैं, ८ असाेज । अमेरिकी राष्ट्रपति डोनाल्ड ट्रम्पले मंगलबार संयुक्त राष्ट्रसंघको महासभालाई सम्बोधन गर्दै गाजा युद्ध ‘तत्काल रोकिनुपर्ने’ बताएका छन्। उनले युद्धविराम सुनिश्चित गर्न आफ्नो प्रशासन गम्भीर रूपमा लागिपरेको पनि उल्लेख गरे।

न्यूयोर्कमा विश्व नेताहरूसँग बोल्दै ट्रम्पले गाजामा हमासको कब्जामा रहेका बन्दीहरूको तत्काल रिहाइको माग दोहोऱ्याए। “हामीले यसलाई जसरी पनि पूरा गर्नुपर्छ। हामी २० जना बाँकी बन्दीहरूलाई फिर्ता चाहन्छौँ,” उनले भने।

ट्रम्पले प्यालेस्टिनी राज्यलाई मान्यता दिने केही पश्चिमी राष्ट्रहरूको पछिल्लो कदमको आलोचना गर्दै त्यसलाई हमासका लागि ‘पुरस्कार’ भएको टिप्पणी गरे। उनले यस्तो मान्यताले लडाकुहरूलाई थप प्रोत्साहन दिने र द्वन्द्व लम्ब्याउने तर्क गरे। ट्रम्पको यो भनाइ संयुक्त राष्ट्रसंघका महासचिव एन्टोनियो गुटेरेसको भनाइसँग बाझिएको छ, जसले हालै प्यालेस्टिनी राज्यको मान्यता ‘अधिकार हो, पुरस्कार होइन’ भनेका थिए ।

हमाद बिन खलिफा विश्वविद्यालयका विज्ञ सुल्तान बराकतले ट्रम्पले युद्ध तत्काल रोक्न आग्रह गरे पनि आफ्नो प्रशासनले इजरायललाई दिइरहेको बलियो समर्थनबारे केही नबोलेको बताएका छन्, जसलाई आलोचकहरूले द्वन्द्व जारी राख्नुको मुख्य कारण मान्छन् ।