अमेरिकी अध्यागमन तथा भन्सार प्रवर्तन (ICE) को तथ्याङ्कअनुसार, बाल यौन अपराध, गम्भीर आक्रमण र चोरी जस्ता अपराधमा संलग्न नेपालीहरूलाई अमेरिकाले फिर्ता पठाएको हो।

गम्भीर अपराधका घटना

डिपोर्ट गरिएका नेपालीहरूले यौन दुराचार, बालयौन शोषण, बल प्रयोग गरी चोरी, हतियार प्रयोग गरेर आक्रमण र मादक पदार्थ सेवन गरी सवारी चलाएको (DUI) जस्ता कसुरहरूमा सजाय भोगेका थिए।

• सन् २०२४ मा यौन दुराचारमा दोषी ठहर भएका ३९ वर्षीय पुरुष र सन् २०२३ मा यौन अपराधमा दोषी ठहर भएका ३६ वर्षीय पुरुषलाई अध्यागमन अदालतको आदेशपछि हालसालै डिपोर्ट गरिएको छ।
• सन् २०२५ को सुरुमा, दूरसञ्चार प्रयोग गरी बालयौन शोषण को अभियोगमा ३० वर्षीय र ३५ वर्षीय दुई पुरुषलाई दोषी ठहर गर्दै देश निकाला गरिएको थियो।
• ICE को रेकर्डअनुसार, मादक पदार्थ सेवन गरी सवारी चलाएको अभियोगमा दोषी ठहर एक नेपाली पुरुषलाई नेपालको सट्टा कतार पठाइएको थियो, यद्यपि यसको कारण स्पष्ट छैन।
• डिपोर्ट गरिएका व्यक्तिहरूलाई न्यूयोर्कको JFK, नेवार्क, बोस्टनको लोगान लगायत प्रमुख विमानस्थलबाट फिर्ता पठाइएको थियो।

डिपोर्ट हुनेको संख्यामा तीब्र वृद्धि

यस वर्ष नेपालीहरू डिपोर्ट हुने दर तीव्र रूपमा बढेको छ।

• सेप्टेम्बर २०२५ मा मात्रै ५३ जना नेपाली नागरिकलाई अमेरिकाबाट फिर्ता पठाइएको थियो।
• यस वर्ष जनवरीदेखि सेप्टेम्बरसम्म कुल २६८ नेपाली डिपोर्ट भइसकेका छन्, जसमा २२६ पुरुष र ४२ महिला रहेका छन्।
• मे, जुन र सेप्टेम्बर महिनामा डिपोर्ट हुनेको सङ्ख्या सबैभन्दा उच्च थियो।

TPS रद्द हुँदा ७ हजार जोखिममा

यसैबीच, अमेरिकी नागरिकता तथा अध्यागमन सेवा (USCIS) ले नेपालीहरूको लागि अस्थायी संरक्षित स्थिति (Temporary Protected Status – TPS) को म्याद सन् २०२५ अगस्ट २० बाट समाप्त भएको घोषणा गरेको छ। यसले गर्दा ७ हजारभन्दा बढी नेपाली नागरिक अमेरिकाबाट निष्कासनको जोखिममा परेका छन्।

नेपाल आइसकेपछि डिपोर्ट भएका नागरिकहरूलाई त्रिभुवन अन्तर्राष्ट्रिय विमानस्थलको अध्यागमन विभागबाट मानव बेचबिखन अनुसन्धान ब्युरोमा सामान्य सोधपुछका लागि हस्तान्तरण गरिने गरेको छ। वासिङ्टन डीसीस्थित नेपाली दूतावासले आफ्ना नागरिकहरूलाई आवश्यक यात्रा कागजात उपलब्ध गराएर फिर्ता प्रक्रियामा सहयोग गरिरहेको छ।