हिमालयन बैंकका प्रमुख कार्यकारी अधिकृत (सीईओ) अशोक राणा का अनुसार अब नेपाल धितोपत्र बोर्ड (सेबोन), नेपाल स्टक एक्सचेन्ज (नेप्से) लगायतका नियामक निकायसँग समन्वय गरी कम्पनी रजिस्ट्रारको कार्यालयबाट स्वामित्व हस्तान्तरण गरिनेछ। यो प्रक्रिया तिहारपछि सम्म लाग्न सक्नेछ।

नेशनल लाइफ इन्स्योरेन्स बन्यो मुख्य साझेदार

हबिब बैंकले आफ्नो नाममा रहेको २ करोड ८० लाख १२ हजार ४४७ कित्ता शेयर नेशनल लाइफ इन्स्योरेन्स कम्पनी लाई बिक्री गरेको हो। नेशनल लाइफले उक्त शेयर प्रतिकित्ता ११२ रुपैयाँ ८० पैसा को न्यूनतम मूल्यमा ६ रुपैयाँ ८ पैसा थप गरी ११८ रुपैयाँ ८८ पैसा मा खरिद गर्ने प्रस्ताव राखेको थियो।

गत साउन अन्तिम साता भएको यस सम्झौताअनुसार नेशनल लाइफले हबिबलाई ३ अर्ब ३३ करोड रुपैयाँभन्दा बढी रकम भुक्तानी गर्नेछ।

हाल हिमालयन बैंकमा नेशनल लाइफको १.२५ प्रतिशत स्वामित्व रहेकोमा अब हबिबको शेयर खरिद गरेपछि उसको हिस्सेदारी बढेर करिब १४ प्रतिशत पुग्नेछ। यससँगै नेशनल लाइफ हिमालयन बैंकको सबैभन्दा ठूलो संस्थापक शेयरधनी बन्नेछ र उसले अब हबिबले पठाएजस्तै बैंकको सञ्चालक पनि पठाउन सक्नेछ।

तीन दशक लामो साझेदारीको अन्त्य

नेपाल राष्ट्र बैंकका संस्थापक गभर्नर हिमालय शम्शेर जबरा र पृथ्वीबहादुर पाँडे को नेतृत्वमा ३३ वर्षअघि खुलेको हिमालयन बैंकमा हबिबले सुरुमा २० प्रतिशत लगानी गरेको थियो।

पछिल्लो समय हिमालयन बैंकले सिभिल बैंकलाई गाभेपछि हबिबको स्वामित्व १३ प्रतिशतभन्दा कम भएको थियो। हबिब बैंक धेरै समयदेखि नेपालबाट बाहिरिन चाहिरहेको थियो र यसअघि पनि दुई पटक शेयर बेच्ने प्रयास गरेको थियो।

• करिब ४ वर्षअघि बेलायतको कमनवेल्थ डेभलपमेन्ट कर्पोरेशन (सीडीसी) ले शेयर किन्न खोज्दा अन्य सञ्चालकहरूको विरोधका कारण रोकिएको थियो।
• २०८० मङ्सिरमा हबिबले हिमालयन रिइन्स्योरेन्स लाई प्रतिकित्ता १३० रुपैयाँ मा शेयर बेच्ने तय भएको थियो, तर तत्कालिन गभर्नर महाप्रसाद अधिकारी ले वित्तीय प्रणालीमा नियमनको कारण देखाउँदै उक्त प्रक्रियालाई स्वीकृति नदिएर रोकिदिएका थिए।

वित्तीय प्रणालीमा आएको शिथिलता र बैंकहरूको वासलात कमजोर बन्दै गएका कारण हबिबले नेशनल लाइफलाई पहिले तय भएको भाउभन्दा सस्तो मूल्य मा शेयर बेच्न राजी भएको हो।