भारत र श्रीलंकामा २०२६ मा हुने टी-२० विश्वकपका लागि दुई खेलअगावै छनोट भइसकेको नेपालले बुधबार घरेलु टोली ओमानलाई ३८ रनले पराजित गरेपछि उपाधि जित्ने सम्भावना बलियो बनेको हो।

सुपर सिक्सको अंक तालिकामा हाल नेपाल ८ अंकसहित शीर्ष स्थानमा रहेको छ। संयुक्त अरब इमिरेट्स (यूएई) र ओमान समान ६-६ अंकका साथ क्रमशः दोस्रो र तेस्रो स्थानमा छन्। यूएईले सबै खेल खेलिसकेको छ भने ओमानले आज जापानसँग आफ्नो अन्तिम खेल खेल्दैछ।

नेपालले आज सामोआलाई हराएमा अपराजित यात्रा कायम राख्दै विश्वकप छनोट प्रतियोगिताको उपाधि जित्नेछ। सामोआ भने सुपर सिक्समा अंकविहीन छ र प्रतियोगिताबाट बाहिरिसकेको छ।

यूएईविरुद्धको एक रनको रोमाञ्चक जितसँगै विश्वकपको यात्रा तय भएकोमा खुशी व्यक्त गर्दै कप्तान रोहित पौडेलले अबको लक्ष्य च्याम्पियन बन्ने रहेको बताएका छन्। नेपालले तेस्रो पटक टी-२० विश्वकप खेल्न लागेको हो।

नेपाल र सामोआबीचको यो ‘फाइनल सरह’को खेल ओमानको अल अमेरात क्रिकेट मैदानमा नेपाली समयअनुसार आज दिउँसो सवा ४ बजेदेखि सुरु हुनेछ। सुपर सिक्सबाट नेपाल, ओमान र यूएईले विश्वकपमा आफ्नो स्थान पक्का गरिसकेका छन् भने जापान, कतार र सामोआ भने बाहिरिएका छन्।²