अस्ट्रेलियासँग सहयोग विस्तारको प्रस्ताव:

अस्ट्रेलियाली संसदको तल्लो सदनका सभामुख मिल्टन डिकसँगको भेटमा अध्यक्ष दाहालले नेपालको शिक्षा, स्वास्थ्य, सुशासन र सामुदायिक वनमा अस्ट्रेलियाले पुर्‍याएको योगदानको प्रशंसा गरे। उनले जलवायु परिवर्तन, नवीकरणीय ऊर्जा र स्थानीय सुशासनको क्षेत्रमा थप सहकार्य गर्ने विश्वास व्यक्त गरे।

अध्यक्ष दाहालले अस्ट्रेलियामा १ लाख ८० हजारभन्दा बढी नेपाली बसोबास गरेको र ६० हजारभन्दा बढी विद्यार्थी अध्ययनरत रहेको जानकारी दिँदै नेपाली समुदाय र विद्यार्थीका लागि सुरक्षित वातावरण उपलब्ध गराएकोमा धन्यवाद दिए। उनले शैक्षिक साझेदारी, प्राविधिक तालिम र अनुसन्धान आदानप्रदान विस्तार गर्न आग्रह गरे।

भारतीय टोलीसँग जनस्तरको सम्बन्धमा जोड:

भारतीय संसदीय प्रतिनिधिमण्डलका नेता अनुराग सिंह ठाकुरसँगको भेटमा अध्यक्ष दाहालले नेपाल–भारत सम्बन्धलाई औपचारिक मात्र नभई जनस्तरको बलियो सम्बन्धका रूपमा व्याख्या गरे।

उनले हालै नेपालमा भएको ‘जेन जेड’ आन्दोलन, अन्तरिम सरकारको गठन र निर्वाचनको घोषणाबारे जानकारी गराउँदै लोकतन्त्रको सुदृढीकरणका लागि समयमै निर्वाचन गर्ने काममा नेपाल लागिपरेको बताए। उनले क्षतिग्रस्त संरचनाहरूको पुनर्निर्माण र आसन्न निर्वाचनका लागि मित्र राष्ट्रहरूको सहयोगको अपेक्षा राखे।

IPU महासचिवसँग संसदीय अभ्यास सुदृढ गर्ने इच्छा:

IPU का महासचिव मार्टिन चुङगोङसँगको भेटमा अध्यक्ष दाहालले नेपालको बदलिएको राजनीतिक अवस्था, प्रतिनिधि सभाको निर्धारित निर्वाचन र विधायी जिम्मेवारी पूरा गर्न राष्ट्रिय सभाको भूमिकाबारे अवगत गराए। उनले संसदीय अभ्यासलाई थप परिष्कृत गर्न र लोकतान्त्रिक संस्थालाई बलियो बनाउन IPU सँग सहकार्य गर्ने इच्छा व्यक्त गरे।