बुधबार फोरमको शुभारम्भ गर्दै महासचिव गुटेर्रेसले भने, “विकासशील देशहरूले प्रगतिमा गम्भीर अवरोध सामना गरिरहेका छन्: त्यो हो ऋण। ऋण तिर्ने वा आफ्ना जनताको सेवा गर्नेमध्ये एउटा रोज्नुपर्ने अवस्था कुनै पनि देशमा आउनु हुँदैन। सेभिल्ला ऋण फोरमले सबैका लागि वित्तीय न्याय प्रदान गर्न मद्दत गर्नेछ।”

उनले यो फोरमले गत जुनमा आयोजित ‘विकासका लागि चौथो अन्तर्राष्ट्रिय वित्तपोषण सम्मेलन’ मा घोषणा गरिएको ‘सेभिल्ला प्रतिबद्धता’ र ‘सेभिल्ला कार्य मञ्च’ लाई साकार पार्न महत्वपूर्ण कदमको रूपमा काम गर्ने बताए।

गुटेर्रेसले विकासशील देशहरू ऋणको भारले ‘दबिएका’ छन् भन्दै चिन्ता व्यक्त गरे। उनले तथ्याङ्क प्रस्तुत गर्दै भने, “विकासशील देशहरूले वार्षिक १.४ ट्रिलियन डलर ऋण सेवामा खर्च गर्छन्। तिनीहरूमध्ये ६१ देशले गत वर्ष आफ्नो सरकारी राजस्वको १० प्रतिशत वा सोभन्दा बढी ब्याज भुक्तानीमा खर्च गरे।”

उनले थप भने, “३.४ अर्ब मानिस यस्ता देशहरूमा बस्छन्, जसले स्वास्थ्य वा शिक्षाभन्दा ऋणको सेवामा बढी खर्च गर्छन्। देशहरूले ऋण तिर्ने वा आफ्ना जनताको सेवा गर्ने बीचमा कहिल्यै छनोट गर्नुपर्ने अवस्था आउनु हुँदैन।”

कम लागतको ऋण र पारदर्शी पुनर्संरचना:

सेभिल्ला प्रतिबद्धता अन्तर्गत कम लागतमा ऋण उपलब्ध गराउने, निष्पक्ष र समयमै ऋण पुनर्संरचना सक्षम पार्ने, र ऋण संकटलाई पहिले नै रोक्ने कार्यहरूमा सहमत भएको उनले बताए। यसका लागि “ऋण वास्तुकलामा विकासशील देशहरूलाई थप आवाज दिन एउटा ऋणी मञ्च (Borrowers’ platform) समावेश गरिएको छ, जसले जिम्मेवार सार्वभौम ऋण लिने र दिने सिद्धान्तहरू विकास गर्न नयाँ प्रयास गर्नेछ।”

गुटेर्रेसले जाम्बियाका राष्ट्रपतिले ऋण पुनर्संरचनाको कार्यको वर्णन गर्दा ‘जाम्बियाबाहेक सबैले सबै कुरामा कुरा गरिरहेका थिए’ भनेको घटना स्मरण गर्दै भने, “ऋण वास्तुकलामा विकासशील देशहरूलाई आवाज दिन र जिम्मेवार सार्वभौम ऋण लिने र दिने सिद्धान्तहरू सिर्जना गर्न ऋणी मञ्च आवश्यक छ।”

उनले सेभिल्ला कार्य मञ्चमा विकासशील देशहरूलाई सार्वजनिक र निजी वित्तलाई अत्यावश्यक क्षेत्रहरूमा प्रयोग गर्न मद्दत गर्न १३० विशिष्ट पहलहरू समावेश गरिएको समेत जानकारी दिए। यो फोरमले ऋण सम्झौतामा राजनीतिक ध्यान कायम राख्दै, त्यसलाई कार्यान्वयन गर्न प्राविधिक मार्गहरू विकास गर्नेछ।

महासचिव गुटेर्रेसले यो फोरमले जनता र देशहरूलाई आवश्यक वित्तीय न्याय प्रदान गर्न मद्दत गर्ने विश्वास व्यक्त गर्दै स्पेन सरकारलाई सहयोगका लागि धन्यवाद दिए।