नेपाली उद्यमी डा. समीर मास्केले स्थापना गरेको आर्टिफिसियल इन्टेलिजेन्स (AI) मा विशेषज्ञता हासिल गरेको यो कम्पनी दुई वर्षअघिको मर्जरपश्चात् ‘Fuse’ नामबाट कारोबारमा आएको हो।

न्यूयोर्कको समयअनुसार बिहान ९:३० बजे नास्डैक स्टक एक्सचेन्ज खुल्ने बित्तिकै कम्पनीको सेयर कारोबार सुरु भएको थियो।

कम्पनीका संस्थापक एवं प्रमुख कार्यकारी अधिकृत (CEO) डा. मास्केले यो ऐतिहासिक उपलब्धिका लागि योगदान गर्ने सम्पूर्ण कर्मचारी र उत्प्रेरित गर्ने सबैलाई कृतज्ञता व्यक्त गरेका छन्। उनले भने, “सानाे टाेलीबाट हामीलाई यो कोशेढुङ्गासम्म पुर्‍याउने नवीन विचार र अवधारणाहरूले नै हामीलाई भविष्यमा अझै विस्तार गर्न प्रेरणा दिनेछन्। विश्वका प्रमुख वित्तीय उपकरणहरूको कारोबार हुने मञ्चमा सूचीकृत हुनु एक उल्लेखनीय उपलब्धि हो।”

बुधबार नै नास्डैकले CSLM Acquisition Company र Fusemachines Inc. बीचको साझेदारीलाई अन्तिम रूप दिइएको र बिहीबारदेखि नास्डैक क्यापिटल मार्केटमा कारोबार सुरु गर्न अनुमति दिइएको घोषणा गरेको थियो।

यो सूचीकरणले नेपाली मूलको कम्पनीले विश्व बजारमा प्रवेश गरेको र लगानीकर्ताका लागि नयाँ अवसर सिर्जना गरेको छ। मर्जरपश्चात् कम्पनीको प्रमुख कार्यकारी अधिकृतमा डा. समीर मास्के र प्रमुख वित्तीय अधिकारीमा क्रिस्टिन चेम्बर्स नियुक्त भएका छन्। सञ्चालक समितिमा समीर मास्के, भरत क्रिश, टिम गोचर, सञ्जय श्रेष्ठ र सलमान आलम रहेका छन्।

हाल यो कम्पनीमा ३५० जनाले रोजगारी पाएका छन्, जसमध्ये २६० जना नेपालस्थित कार्यालयमा कार्यरत छन्।