अमेरिकाका प्रमुख प्रविधि कम्पनी एप्पल र गुगलले आफ्ना कर्मचारीहरूलाई अमेरिका बाहिर यात्रा नगर्न चेतावनी जारी गरेका छन्। अमेरिकी राष्ट्रपति डोनाल्ड ट्रम्पको आप्रवासी भिसा नीति कडाइ भएपछि कम्पनीहरूले यस्तो कदम उठाएका हुन्।

कम्पनीहरूले उल्लेख गरेका छन् कि नयाँ नियमअनुसार विदेश गएपछि अमेरिका फर्किन समस्या पर्न सक्ने जोखिम छ। अमेरिकी गृह सुरक्षा विभागले (DHS) यात्रुहरूको पछिल्ला पाँच वर्षको सामाजिक सञ्जाल गतिविधि जाँच अनिवार्य गरेपछि भिसा अपोइन्टमेन्टमा लामो समय कुर्नुपर्ने अवस्था आएको छ।

तीव्र रूपमा बढेको जाँच प्रक्रिया र भिसा नवीकरण ढिलाइका कारण एप्पल र गुगलका कर्मचारीलाई सम्भव भएसम्म अमेरिका नछोड्न सल्लाह दिइएको छ। दुबै कम्पनीमा करिब ३ लाख कर्मचारी कार्यरत छन् र उच्च दक्ष विदेशी कामदारमा निर्भर छन्।

एप्पलसँग काम गर्ने कानुनी फर्म फ्रागोमेनले एच–वानबी भिसा स्टाम्प नभएका कर्मचारीहरूलाई अहिलेका लागि अन्तर्राष्ट्रिय यात्रा नगर्न कडा सिफारिस गरेको छ। यात्रा अनिवार्य भए, जोखिमबारे छलफल गर्न एप्पल इमिग्रेशन टिम वा फ्रागोमेनसँग सम्पर्क गर्न भनिएको छ।

एच–वानबी भिसा प्रविधि कम्पनीमा उच्च दक्ष विदेशी कामदारलाई दिने भिसा हो। सामान्यतया तीन वर्षका लागि मान्य हुने यो भिसा नवीकरणका लागि आफ्नो देशको अमेरिकी दूतावासमा जानुपर्छ। तर ट्रम्प प्रशासनका नयाँ नीतिका कारण सामान्य यात्रा गर्दा पनि कर्मचारीहरूलाई महिनौँसम्म अमेरिका बाहिर अलपत्र पार्न सक्ने स्थिति उत्पन्न भएको छ।

द वाशिङ्टन पोस्टको रिपोर्ट अनुसार, भारतमा रहेका सयौँ एच–वानबी भिसाधारकको अपोइन्टमेन्ट स्थगित भएको छ। अमेरिकी विदेश मन्त्रालयले आवेदकहरूले राष्ट्रिय सुरक्षा र सार्वजनिक सुरक्षामा खतरा नपर्ने सुनिश्चित गर्न थप समय आवश्यक रहेको जनाएको छ।

गुगलभित्र, एल्फाबेट वर्कर्स युनियनले एच–वानबी भिसामा कार्यरत कर्मचारीको सुरक्षा सुनिश्चित गर्न अभियान चलाइरहेको छ। यस कदमले प्रविधि कम्पनीहरूमा कार्यरत विदेशी दक्ष जनशक्तिलाई अमेरिका यात्रा र भिसा नवीकरणमा सतर्क रहनुपर्ने आवश्यकतालाई दर्शाएको छ।