महिन्द्राले आफ्नो नयाँ इलेक्ट्रिक एसयुभी ३एक्सओ ईभी सार्वजनिक गरेको छ। मंगलबार भारतको राजस्थानमा आयोजित कार्यक्रममा यो ईभी दुई भेरियन्ट—एएक्स५ र एएक्स७ एल—मा लञ्च गरिएको हो। कम्पनीका अनुसार गाडीको डेलिभरी २३ फेब्रुअरी २०२६ बाट सुरु हुनेछ।

३एक्सओ ईभीको मूल्य एएक्स५ भेरियन्टका लागि १३.८९ लाख भारतीय रुपैयाँ र एएक्स७ एल भेरियन्टका लागि १४.९६ लाख भारतीय रुपैयाँ तोकिएको छ। यसमा ७.२ किलोवाट एसी चार्जर लिन चाहने ग्राहकले थप ५० हजार रुपैयाँ तिर्नुपर्नेछ।

नयाँ ३एक्सओ ईभी आईसीई (पेट्रोल/डिजेल) इन्जिनमा आधारित ३एक्सओ एसयुभीको प्लेटफर्ममा तयार गरिएको हो। यसमा अघिल्लो एक्सयुभी ४०० बाट ब्याट्री र इलेक्ट्रिक मोटर प्रयोग गरिएको छ। यही कारण यो मोडलले एक्सयुभी ४०० लाई प्रतिस्थापन गर्दै बजारमा टाटा नेक्सन ईभीसँग प्रत्यक्ष प्रतिस्पर्धा गर्नेछ।

महिन्द्राका अनुसार ३एक्सओ ईभीले वास्तविक प्रयोगमा करिब २८५ किलोमिटर रेन्ज दिन्छ। गाडीमा ३९.४ किलोवाट–आवर क्षमताको ब्याट्री जडान गरिएको छ र यो दुई ट्रिम विकल्पमा उपलब्ध छ। बाहिरी तथा भित्री डिजाइन भने प्रायः आईसीई ३एक्सओ जस्तै राखिएको छ।

पावरट्रेनतर्फ, ३एक्सओ ईभीमा अगाडिको पांग्रालाई चलाउने इलेक्ट्रिक मोटर छ, जसले १५० एचपी पावर र ३१० एनएम टर्क उत्पादन गर्छ। गाडीले ० देखि १०० किमि/घण्टा गति ८.३ सेकेन्डमा लिन सक्छ। यसमा ‘फन’, ‘फास्ट’ र ‘फियरलेस’ गरी तीनवटा ड्राइभ मोड दिइएको छ। ५० किलोवाट डीसी फास्ट चार्जर प्रयोग गर्दा ब्याट्री ० देखि ८० प्रतिशतसम्म ५० मिनेटमा चार्ज हुने कम्पनीको दाबी छ।

आईसीई मोडलबाट रूपान्तरण गरिएको भएकाले ३एक्सओ ईभी आकारमा अघिल्लो एक्सयुभी ४०० भन्दा सानो छ। यसको लम्बाइ ४ मिटरभन्दा कम भएकाले बुट स्पेस पनि केही घटेको छ। हालका लागि यो महिन्द्राको एकमात्र आईसीई–आधारित ईभी हो। कम्पनीका अन्य ईभी मोडलहरू—एक्सईभी ९ई, एक्सईभी ९एस र बीई ६—पूर्ण रूपमा बीई (बोर्न–इलेक्ट्रिक) प्लेटफर्ममा आधारित छन्।

डिजाइनका हिसाबले ३एक्सओ ईभी बाहिरबाट आईसीई भर्सनसँग झण्डै उस्तै देखिन्छ। ग्रिलमा बडी–कलर फिनिस दिइएको छ भने अगाडिको बम्परमा हल्का फरक डिजाइन गरिएको छ। भित्री भागमा उही ड्यासबोर्ड लेआउट राखिए पनि सेन्टर कन्सोल, एसी भेन्ट र स्टेयरिङमा ब्रान्ज कलरको हाइलाइट दिइएको छ।

फिचरको कुरा गर्दा, ३एक्सओ ईभीमा दुईवटा १०.२५ इन्चका स्क्रिन, वायरलेस एप्पल कारप्ले र एन्ड्रोइड अटो, सबै–एलईडी लाइट, डुअल–जोन एसी, इलेक्ट्रोनिक पार्किङ ब्रेक, वायरलेस चार्जर, ६ एयरब्याग, ईएसपी र क्रुज कन्ट्रोल जस्ता सुविधा छन्। टप भेरियन्टमा प्यानोरामिक सनरुफ, लेदरेट सिट, ७–स्पिकर हरमन कार्डन अडियो सिस्टम, १७ इन्च अलोय ह्विल र एडास पनि उपलब्ध छ।

बजारमा ३एक्सओ ईभीको मुख्य प्रतिस्पर्धी टाटा नेक्सन ईभी हुनेछ। नेक्सन ईभी हाल १२.४५ लाखदेखि १७.२९ लाख रुपैयाँ (एक्स–शोरूम) मूल्य दायरामा उपलब्ध छ र यसमा दुई ब्याट्री विकल्पसहित अधिकतम ४६५ किलोमिटर एआरएआई प्रमाणित रेन्ज दिइएको छ।