काठमाडौं । एमाले निकट प्रेस चौतारीको दशौं महाधिवेशन आइतबारदेखि विराटनगरमा सुरु हुँदैछ । तर महाधिवेशनभन्दा अगाडि नै प्रधानमन्त्री केपी ओलीले गणेश पाण्डेलाई अध्यक्षको टीका लगाइदिएपछि अर्का आकांक्षी राजेश राईले चुनौती दिएका छन् ।

राईले महाधिवेशन सुरु हुनुअघि लामो प्रेस नोट जारी गर्दै निर्वाचनकै माध्यमबाट नयाँ नेतृत्व चयन हुनुपर्ने अडान राखेका छन् । अहिले बाहिर हल्ला र चर्चा गरिए जस्तो चौतारीमा कुनै त्यस्तो सम्भावना नरहेको भन्दै एमाले अध्यक्ष ओलीलाई समेत बोधार्थ पठाएका छन् । राई चौतारीका अध्यक्षका दाबेदार हुन् । तर उनलाई एमाले नेता योगेश भट्टराई र पूर्वराष्ट्रपति विद्यादेवी भण्डारी निकट भन्दै ओली पक्षले नेतृत्वमा ल्याउन चाहेको छैन ।

प्रेस चौतारीका उपाध्यक्षसमेत रहेका पाण्डे भने ईश्वर पोखरेल निकट पत्रकार हुन् । यदि नयाँ नेतृत्वका लागि चुनाव भएमा राईले बाजी मार्ने सम्भावना रहेको एमाले निकट पत्रकारहरु बताउँछन् । प्रधानमन्त्री ओलीले भने अध्यक्षमा पाण्डे र महासचिवमा झापाकै चेतन अधिकारीलाई बनाउन निर्देशन दिएका छन् । अधिकारी ओली पहिले प्रधानमन्त्री हुँदा प्रेस संयोजक थिए ।

राईले लेखेका छन्
हामी यतिबेला प्रेस चौतारी नेपालको नीति र नेतृत्व निर्माणका निमित्त विराटनगरमा जुटेका छौँ । प्रेस चौतारी नेपालको यो ऐतिहासिक दशौ राष्टिय सम्मेलनलाई राष्ट्रिय चासोका साथ हेरिएको छ । र स्वभाविक पनि हो । देशका सात हजार बढी पत्रकारहरु आवद्ध रहेको संस्था र देशकै नेतृत्व गरिरहेको नेकपा एमालेको जनसंगठन हुनुको हैसियतले यतिको चासो र चर्चा आवश्यक छ ।

तपाईहरुको चासो र चाहनालाई ठेस् नलाग्नेगरी प्रेस चौतारी नेपालको नीति र नेतृत्व निर्माण हुनेमा विश्वस्त छु । तर हाम्रो महाधिवेशनलाई लिएर कतिपयले पार्टीकै लोकतान्त्रिक मूल्य, मान्यता र प्रतिबद्धताप्रति नै शंका गरेको पाइयो । त्यस्तो शंका हुनु भनेको जबजको मूल्य मान्यता, देशको शासन प्रणाली र देशभरबाट आउनु भएका प्रतिनिधिहरुको विवेकमाथि पनि प्रश्न हो । हामी किमार्थ त्यस्तो हुन दिने छैनौं ।
म विश्वास दिलाउन चाहन्छु । प्रेस चौतारी नेपालको नेतृत्व निर्माण लोकतान्त्रिक प्रक्रिया बमोजिम र सार्वभौम प्रतिनिधिहरुको मत मार्फत हुनेछ ।

पक्कैपनि नेतृत्व पंक्तिको सुझबुझपूर्ण सल्लाह र सुझावलाई प्रतिनिधिहरुले गम्भीरताका साथ लिनेमा पनि म विश्वस्त छु । राष्टिय सम्मेलनमा प्रतिनिधिको अभिमत नै निर्णायक तत्व हो । यस कुरालाई हामीले हेक्का राखेका छौं । सार्वजनिक चर्चा र चिन्ता गरिए जस्तो अलोकतान्त्रिक प्रक्रियामा हाम्रो सम्मेलन जानेछैन । र जान दिइने छैन । सार्वभौम प्रतिनिधिहरुले प्रेस चौतारी नेपालको नीति निर्माणमा निर्भय आफ्नो अभिमत राख्नु हुनेछ । नेतृत्व निर्माणका निमित्त चुन्ने र चुनिने प्रक्रियामा सामेल हुनुहुनेछ । पक्कैपनि सर्वसम्मति जुट्नेछ । देशभरबाट आउनु भएका प्रतिनिधि साथीहरुलाई साक्षी राखेर उम्मेदवारहरुबीच सर्वसम्मतिको प्रयत्न हुनेछ ।

यदि सर्वसम्मति नजुटे मत विभाजनको लोकतान्त्रिक प्रक्रिया अवलम्बन हुनेछ । मैले आफ्नो पृष्ठभूमि र योजनाका साथ यस महाधिवेशन मार्फत केन्द्रिय अध्यक्ष पदमा उम्मेद्वारी घोषणा गरिसकेको छु । प्रतिनिधि र शुभेच्छुकहरुमा मेरो उम्मेदवारबारे कुनै शंका नलिन आग्रह गर्दछु । मेरो उम्मेदवारीको निरुपण लोकतान्त्रिक विधिमार्फत नै हुनेछ । कुनै करबल अथवा अलोकतान्त्रिक विधिप्रति कुनै सम्झौता नहुनेमा ढुक्क रहन आग्रह गर्दछु । र, चुन्ने र चुनिने अधिकारप्रति प्रतिबद्ध रहन सबैमा आग्रह समेत गर्दछु ।