ट्रम्पले बिहीबार अबेर राति आफ्नो सामाजिक सञ्जाल ‘ट्रुथ सोसल’ मा एक पोस्ट गर्दै यस बारे जानकारी गराएका हुन्। उनले लेखेका छन्, “जेफ्री एप्सटाइनलाई दिइएको हास्यास्पद प्रचारलाई मध्यनजर गर्दै, मैले महान्यायाधिवक्ता पाम बन्डीलाई अदालतको स्वीकृतिमा सबै सान्दर्भिक ग्रान्ड जुरीका बयानहरू उपलब्ध गराउन आग्रह गरेको छु। डेमोक्र्याटहरूले फैलाएको यो ‘स्क्याम’ अब तुरुन्तै अन्त्य हुनुपर्छ!” ट्रम्पको यो घोषणाको केही मिनेटमै महान्यायाधिवक्ता पाम बन्डीले ‘एक्स’ (पहिले ट्विटर) मा पोस्ट गर्दै न्याय विभाग शुक्रबार नै ती बयानहरू सार्वजनिक गर्न अदालत समक्ष आग्रह गर्न तयार रहेको पुष्टि गरेकी छिन्।

राष्ट्रपति ट्रम्पको यो निर्णय उनको ‘मेक अमेरिका ग्रेट अगेन’ (MAGA) समर्थकहरूको निरन्तर दबाबपछि आएको हो। MAGA समर्थकहरूले लामो समयदेखि एप्सटाइन प्रकरणमा थप खुलासाको माग गर्दै आएका थिए। यसअघि न्याय विभाग र एफबीआईले एप्सटाइनको कुनै “ग्राहक सूची” नभएको र उनले आत्महत्या गरेको निष्कर्षसहितको प्रतिवेदन सार्वजनिक गर्दा ट्रम्पका केही कट्टर समर्थकहरूले समेत असन्तुष्टि व्यक्त गरेका थिए।

यद्यपि, ट्रम्पले ती कागजातहरू पूर्ण रूपमा सार्वजनिक गर्न निर्देशन दिएका हुन् वा होइनन् र कहिलेसम्म सार्वजनिक हुन्छन् भन्ने बारेमा भने अझै स्पष्ट भइसकेको छैन। ग्रान्ड जुरीका बयानहरू सामान्यतया गोप्य राखिने भएकाले, त्यसलाई सार्वजनिक गर्न अदालतको स्वीकृति अनिवार्य हुन्छ। यस प्रक्रियामा समय लाग्न सक्ने र तत्कालै सबै विवरण बाहिर नआउन सक्ने विज्ञहरूले बताएका छन्। यस कदमले एप्सटाइनको रहस्यमय मृत्यु र उनीसँग जोडिएका शक्तिशाली व्यक्तिहरूको सम्बन्धबारे थप प्रकाश पार्ने अपेक्षा गरिएको छ।