यसैगरी, कमर्सियल इभीको आयातमा त झन् ७३ प्रतिशतको वृद्धि देखिएको छ । गत वर्ष ११ अर्ब ६ करोड रुपैयाँ बराबरका ३ हजार ८१३ युनिट कमर्सियल इभी आयात भएका छन्, जसबाट सरकारले २ अर्ब ७३ करोड रुपैयाँ राजस्व संकलन गरेको छ । अघिल्लो वर्ष १ हजार ५ युनिट कमर्सियल इभी आयात भएका थिए ।

दुईपाङ्ग्रे सवारीसाधनको कारोबारमा उछाल

बाइक र स्कुटरको बजारमा पनि उल्लेखनीय उछाल आएको छ । गत आर्थिक वर्षमा बाइक र स्कुटरको आयात ३४ प्रतिशतले बढेको छ । २४ अर्ब ५० करोड रुपैयाँ बराबरका २ लाख १ हजार युनिट बाइक र स्कुटर आयात गरिएको छ, जसबाट सरकारले २४ अर्ब ७३ करोड रुपैयाँ राजस्व संकलन गरेको छ । अघिल्लो वर्ष १ लाख ३४ हजार ५५६ युनिट बाइक र स्कुटर आयात भएका थिए ।

अन्य सवारीसाधनको आयात विवरण

तीनपाङ्ग्रे सवारीसाधनतर्फ गत आर्थिक वर्ष ८४ करोड रुपैयाँ बराबरका ४ हजार २१२ युनिट आयात भएका छन्, जुन अघिल्लो वर्षको १ हजार ७१६ युनिटको तुलनामा धेरै हो । इलेक्ट्रिक पावरट्रेन भएका दुई/तीन पाङ्ग्रे सवारीसाधन २ अर्ब ९६ करोड रुपैयाँ बराबरका २९ हजार ४३७ युनिट आयात भएका छन्, जसबाट सरकारले १ अर्ब रुपैयाँ राजस्व संकलन गरेको छ । अघिल्लो वर्ष त्यस्ता २० हजार ७०४ युनिट सवारीसाधन आयात भएका थिए ।

इन्धनबाट चल्ने सवारीसाधनको आयातमा पनि वृद्धि

इन्धनबाट चल्ने प्यासेन्जर गाडीको आयात पनि बढेको छ । गत आर्थिक वर्ष ६ अर्ब ९३ करोड रुपैयाँ बराबरका ४ हजार ९७८ युनिट इन्धन प्यासेन्जर गाडी आयात भएका छन्, जसबाट १६ अर्ब ७५ करोड रुपैयाँ राजस्व संकलन भएको छ । अघिल्लो वर्ष ४ हजार २४६ युनिट इन्धन प्यासेन्जर गाडी आयात भएका थिए । यस्तै, कमर्सियल इन्धन गाडी ७ अर्ब २८ करोड रुपैयाँ बराबरका ४ हजार २३७ युनिट आयात भएका छन्, जसबाट सरकारले ७ अर्ब ३६ करोड रुपैयाँ राजस्व संकलन गरेको छ । यसरी समग्रमा नेपाली अटोबजारमा आयातमा उत्साहजनक वृद्धि देखिएको छ ।