मङ्गलबार साँझ ह्वाइट हाउसमा आयोजित एक कार्यक्रममा ट्रम्पले यसलाई “इतिहासकै सबैभन्दा ठूलो व्यापार सम्झौता” भएको दाबी गर्दै भने, “यो सम्झौता सबैका लागि ठूलो कुरा हो। म जहिले पनि भन्छु – सहमति सबै पक्षका लागि ठूलो हुनुपर्छ। यो ठूलो सम्झौता हो।” उनले युरोपेली सङ्घसँगको व्यापार सम्झौता पनि बुधबार घोषणा हुने र अन्य सम्झौताहरू पनि चाँडै हुने बताए।

जापानको प्रतिक्रिया र पृष्ठभूमि

जापानका प्रधानमन्त्री शिगेरु इशिबाले उक्त सम्झौताको स्वागत गरेका छन्। यद्यपि, उनले सम्झौताका थप विवरणहरू सावधानीपूर्वक अध्ययन गर्न बाँकी रहेको बताएका छन्। जापानका मुख्य व्यापार वार्ताकार रायोसी आकाजावाले एउटा फेसबुक पोस्टमा ‘मिसन पूरा भएको’ ह्यासट्यागसहित ह्वाइट हाउस भ्रमण गरेको उल्लेख गरेका छन्।

यो सम्झौता हुनुअघि, ट्रम्पले जापानलाई यसै महिनाको सुरुमा पठाएको पत्रमा अगस्ट १ भन्दा अगाडि नयाँ व्यापार सम्झौता नभए अमेरिकामा जापानले गर्ने सामग्रीहरूको निर्यातमा २५ प्रतिशत कर लगाउने चेतावनी दिएका थिए। यो दर अप्रिल २ मा घोषणा गरिएको २४ प्रतिशतको ट्यारिफभन्दा एक प्रतिशतले बढी थियो। अप्रिलको उक्त ट्यारिफ योजना, जसले विश्वभरका धेरै अमेरिकी व्यापारिक साझेदारहरूलाई प्रभावित पार्ने थियो, विश्वव्यापी बजार उथलपुथल भएपछि ९० दिनका लागि रोकिएको थियो। यसले टोकियोका व्यापार प्रतिनिधिहरूलाई वासिङ्टनमा आफ्ना समकक्षीहरूसँग वार्ता गर्न पर्याप्त समय दिएको थियो।

बजारमा सकारात्मक प्रभाव र आन्तरिक राजनीतिक दबाब

यो सम्झौताको खबरसँगै टोकियोमा जापानको बेन्चमार्क शेअर सूचकाङ्क निक्केई २२५ बुधबार बिहान २.५ प्रतिशतभन्दा धेरै बढेको थियो। प्रसारण संस्था एनएचकेले जापानी कार निर्माता कम्पनीमाथिको विद्यमान कर कटौती हुने जानकारी दिएपछि टोयोटा, निसान र होन्डाजस्ता विशाल मोटर उद्योगका शेअर मूल्यले ठूलो फड्को मारेका थिए। प्रधानमन्त्री शिगेरु इशिबाले पछि देशका कार निर्माताहरूले अब अमेरिका निर्यात गर्दा २५ प्रतिशतको साटो १५ प्रतिशत तिर्नुपर्ने बताए।