बोर्डले बजेटको प्रमुख हिस्सा पर्यटन बजार व्यवस्थापन तथा प्रवद्र्धनमा केन्द्रित गरेको छ, जसका लागि कुल बजेटमध्ये ४३ करोड ६१ लाख रुपैयाँ विनियोजन गरिएको छ। यसका अतिरिक्त, कर्मचारी र कार्यालय सञ्चालनका लागि २६ करोड २७ लाख रुपैयाँ, पर्यटन सम्पदा तथा संरचना विकासका लागि १८ करोड ६३ लाख रुपैयाँ, र जनसम्पर्क तथा प्रचारप्रसारका लागि १२ करोड १५ लाख रुपैयाँ छुट्याइएको छ।

प्रादेशिक विस्तार र अन्य कार्यक्रम

पोखरास्थित गण्डकी प्रदेश कार्यालयका लागि ११ करोड ६६ लाख रुपैयाँ विनियोजन गरिएको छ भने अन्य नयाँ प्रादेशिक तथा क्षेत्रीय कार्यालयको स्थापना र सञ्चालनमा ११ करोड १२ लाख रुपैयाँ छुट्याइएको छ। बोर्डका अनुसार, विशेष प्रवद्र्धनात्मक गतिविधिका लागि ४ करोड ६२ लाख रुपैयाँ, कार्यकारी समिति तथा प्रमुखको सचिवालय सञ्चालनका लागि ३ करोड रुपैयाँ, र अनुसन्धान, योजना तथा अनुगमन कार्यमा २ करोड ७६ लाख रुपैयाँ विनियोजन गरिएको छ।

प्रमुख लक्ष्य र रणनीति

बोर्डले पर्यटन आयमा १५ प्रतिशत वृद्धि गर्ने लक्ष्यसहित यो बजेट ल्याएको छ। यसका लागि पर्यटक आगमन बढाउने, नयाँ पूर्वाधार संरक्षण गर्ने, जनशक्ति उत्पादन र डिजिटल प्रवद्र्धनमा विशेष ध्यान दिइएको छ। नेपाललाई सुरक्षित र आकर्षक गन्तव्यको रूपमा प्रवद्र्धन गर्न ५० प्रमुख स्रोत बजारमा कार्यक्रम गर्ने योजना बोर्डले बनाएको छ। साथै, कम्तीमा ५ हजार नयाँ जनशक्ति उत्पादन गर्दै उनीहरूको क्षमता अभिवृद्धिमा काम गरिनेछ। बजेटमार्फत लुम्बिनी र सुदूरपश्चिममा प्रादेशिक कार्यालय खोल्ने तयारी गरिएको छ। माइस (सभा, सम्मेलन, सेमिनार) पर्यटन प्रवद्र्धनका लागि छुट्टै २ करोड रुपैयाँ छुट्याइएको छ, र विदेशी पर्यटकलाई लक्षित गरी आयोजना गरिने कार्यक्रममा ७५ प्रतिशत अन्तर्राष्ट्रिय सहभागिता सुनिश्चित गरिनेछ।