काठमाडाैं, १२ साउन । संयुक्त राज्य अमेरिका र युरोपेली संघबीचको लामो समयदेखिको व्यापार तनाव अन्त्य गर्दै एउटा महत्त्वपूर्ण व्यापार सम्झौता भएको छ । अमेरिकी राष्ट्रपति डोनाल्ड ट्रम्प र युरोपेली आयोगकी अध्यक्ष उर्सुला भोन डेर लायनबीच स्कटल्याण्डमा भएको निर्णायक वार्ताले विश्वका दुई ठूला आर्थिक शक्तिबीच सम्भावित व्यापार युद्ध टारेको हो ।

यो सम्झौताअनुसार, युरोपेली संघबाट आयात हुने सबै वस्तुहरूमा अमेरिकाले १५ प्रतिशत भन्सार शुल्क लगाउने सहमति भएको छ । यसअघि राष्ट्रपति ट्रम्पले युरोपेली वस्तुहरूमा ५० प्रतिशतसम्मको भन्सार दर लगाउने धम्की दिएका थिए, जुन शुक्रबारदेखि लागू गर्ने भनिएको ३० प्रतिशत आयात करको आधा हो ।

सम्झौताअनुसार, २७ सदस्यीय युरोपेली संघले अमेरिकी निर्यातकर्ताहरूका लागि निश्चित उत्पादनहरूमा शून्य प्रतिशत भन्सार खुला गर्नेछ । युरोपेली आयोगकी अध्यक्ष भोन डेर लायनले यस सम्झौताको स्वागत गर्दै यसले दुवै साझेदार राष्ट्रहरूबीच स्थायित्व ल्याउने बताउनुभयो । अमेरिका र युरोपेली संघले संयुक्त रूपमा विश्व व्यापारको झण्डै एक तिहाइ हिस्सा ओगटेका छन् ।

सम्भावित व्यापार युद्धका कारण अमेरिकामा युरोपेली वस्तुहरू महँगो हुने, अमेरिकी उद्योग प्रभावित हुने र विश्व अर्थतन्त्रमै असर पर्ने अनुमान गरिएको थियो । यो सम्झौताले त्यस्तो ठूलो जोखिमलाई टारेको विश्लेषण गरिएको छ ।

सम्झौतामा हवाईजहाज, सेमिकन्डक्टर डिभाइस, सामान्य औषधि र केही कृषि उत्पादनहरूमा लाग्ने कर हटाइएको छ । यी क्षेत्रका उद्योगहरूले सम्झौतालाई स्वागत गरेका छन् । तर, मोटर गाडी क्षेत्रले भने यसको आलोचना गरेको छ । सम्झौताअनुसार युरोपेली गाडीहरूमा १५ प्रतिशत कर लगाइनेछ । यद्यपि यो मेक्सिकोमा बनेका गाडीहरूलाई अमेरिकाले तिर्ने २५ प्रतिशतभन्दा कम भए पनि यसले प्रतिस्पर्धात्मक असमानता ल्याउने मोटर गाडी उद्योगको भनाइ छ ।