तरुण खबर
१८ श्रावण २०८२, आईतवार १४:३९
काठमाडाैं, १९ साउन । एक समय विलासिताको साधन मानिने इन्टरनेट अहिले आधुनिक जीवनशैलीको अभिन्न अंग बनिसकेको छ। नेपालमा इन्टरनेट सेवा प्रदायक कम्पनीहरूबीच तीव्र प्रतिस्पर्धा बढिरहेको छ। सेवाको गुणस्तर र ग्राहक सन्तुष्टिलाई केन्द्रमा राख्दै कम्पनीहरू आफ्नो बजार हिस्सा विस्तार गर्न लागिपरेका छन्।
नेपाल दूरसञ्चार प्राधिकरणको पछिल्लो तथ्यांकअनुसार, नेपालमा कुल ३२ लाख ४८ हजार ६७४ फिक्स्ड ब्रोडब्यान्ड ग्राहक छन्। यसमध्ये अधिकांश ग्राहक (३२ लाख १९ हजार ३९१) ले फाइबर प्रविधि प्रयोग गर्छन्, जसले गर्दा इन्टरनेट बजारको मेरुदण्ड फाइबर प्रविधि बनेको देखिन्छ। यस तथ्यांकले बजारमा तीव्र पुनर्संरचनाको संकेत दिएको छ।
ग्राहक संख्याका आधारमा वर्ल्डलिंक कम्युनिकेशन लिमिटेड बजारमा निर्विवाद नेतृत्वमा छ। देशभर १० लाख १२ हजार ४१९ ग्राहकसहित कम्पनीले कुल बजारको ३१.१७ प्रतिशत हिस्सा ओगटेको छ।
दोस्रो स्थानका लागि भएको प्रतिस्पर्धामा भने ठूलो फेरबदल आएको छ। केही समयअघिसम्म दोस्रो स्थानमा रहेको नेपाल टेलिकमलाई पछि पार्दै डिश मिडिया नेटवर्क लिमिटेड दोस्रो स्थानमा उक्लिएको छ। डिश मिडियाका हाल ३ लाख ६१ हजार ३९४ ग्राहक छन्, जुन कुल बजारको ११.१२ प्रतिशत हो। ग्राहक संख्यामा कमी आएका कारण नेपाल टेलिकम तेस्रो स्थानमा झरेको छ। टेलिकमका अहिले ३ लाख ५४ हजार ४३८ ग्राहक छन्।
चौथो स्थानमा भायानेट कम्युनिकेशन लिमिटेड (३ लाख १९ हजार ८ ग्राहक) र पाँचौं स्थानमा सुबिसु केबलनेट (२ लाख ९९ हजार २२५ ग्राहक) रहेका छन्।
अन्य प्रमुख इन्टरनेट सेवा प्रदायकहरूको अवस्था:
यीबाहेक, ब्रोडलिंक, फाइबर वर्ल्ड, सजिलो नेट, फर्स्टलिंक कम्युनिकेशन, कनेक्ट नेपाल नेटवर्क जस्ता साना प्रदायकहरूले पनि आफ्नो सेवा विस्तार गरिरहेका छन्। नेपालमा प्रविधिमा लगानी र सेवाको गुणस्तरका आधारमा भविष्यमा यो प्रतिस्पर्धा अझै तीव्र हुने संकेत देखिएको छ।
अनामनगर, काठमाण्डौ , नेपाल ।
9823523456
tarunkhabar5@gmail.com
