यसपटक ‘गो फर मोर’ भन्ने नाराका साथ प्रदर्शनीमा नवीनतम प्रविधि र स्मार्ट मोबिलिटीका समाधानहरू प्रस्तुत गरिनेछ। अटो शोको उद्घाटन उपप्रधानमन्त्री तथा अर्थमन्त्री विष्णु प्रसाद पौडेलले गर्ने तय भएको छ।

नाडाका अनुसार, यो प्रदर्शनी नेपालको अटोमोटिभ भविष्यतर्फको यात्रा हो, जहाँ दिगोपन, स्वचालन र स्मार्ट सोचको संगम हुनेछ। प्रदर्शनीमा युनिट्री रोबोट्स र दीपल ईभीटिओएल यूएभी (शहरी हवाई यातायात) जस्ता प्रविधिहरू पहिलोपटक सार्वजनिक रूपमा देखाइनेछन्।

प्रदर्शनीको विवरण र आकर्षणहरू:

• ब्रान्ड र प्रदर्शक: १९ वटा यात्रुवाहक गाडी, १३ वटा हल्का व्यावसायिक गाडी, ४ वटा दुईपाङ्ग्रे सवारी साधनका ब्रान्डहरू सहभागी हुनेछन्। यस्तै, ल्युब्रिकेन्ट, टायर, ब्याट्री, ग्यारेज उपकरण र वित्तीय सेवालगायतका ३५ कम्पनीका स्टलहरू रहनेछन्। कुल १२५ भन्दा बढी प्रदर्शक र १ लाखभन्दा बढी दर्शकले अवलोकन गर्ने अपेक्षा छ।
• क्षेत्रफल: यो प्रदर्शनी कुल ३ लाख वर्गफुटमा फैलिएको हुनेछ, जसमा १ लाख ६२ हजार ५०० वर्गफुट प्रदर्शनी क्षेत्रका लागि छुट्याइएको छ। नाडाले यसलाई अहिलेसम्मकै सबैभन्दा ठूलो अटो शो दाबी गरेको छ।
• विशेष आकर्षण: प्रदर्शनीमा भिन्टेज मोटर शो, मेड इन नेपाल प्याभिलियन, र ईभी तथा स्मार्ट मोबिलिटीमा आधारित सेमिनारहरू हुनेछन्। भिन्टेज मोटर शोमा मोरिस माइनर, फियाट, प्यूजो, बीटल, मिनी कूपर जस्ता क्लासिक कारहरू देखाइनेछन्। मेड इन नेपाल प्याभिलियनमा स्वदेशी उत्पादन र नवप्रवर्तनलाई प्राथमिकता दिइनेछ।
• सुरक्षा र सहजता: आगन्तुकको सुरक्षाका लागि विभिन्न जोन विभाजन, मेडिकल टोली, ट्राफिक सूचना डेस्क, र निगरानी प्रणालीको व्यवस्था गरिएको छ।

• टिकट र प्रायोजक: कार्यक्रमको एक्सक्लुसिभ टिकटिङ पार्टनर खल्ती बाइ आईएमई रहेको छ, जसबाट भदौ २ गतेसम्म अग्रिम टिकट खरिद गर्दा २० प्रतिशत क्यासब्याक पाइनेछ। अटो शोको टाइटल स्पोन्सर एमएडब्ल्यु वृद्धि हो भने को-स्पोन्सरमा शिखर इन्स्योरेन्स र मोबिलिटी पार्टनरमा यांगो छन्। नेपाल ल्युब तेलले शोका क्रममा १२ जना भाग्यशाली विजेतालाई एक वर्षका लागि निःशुल्क ल्युब्रिकेन्ट सेवा दिने घोषणा गरेको छ।