ट्रम्पको यो कदमलाई लिएर वाशिङ्टन, डीसीकी मेयर मुरियल बाउजरले भने असहमति जनाएकी छन्। उनले राजधानीको प्रशासनिक नियन्त्रण अझै पनि स्थानीय प्रशासनकै हातमा रहेको र हिंसात्मक अपराध तीन दशकयताकै न्यूनतम स्तरमा पुगेको दाबी गरेकी छन्। अमेरिकी न्याय मन्त्रालयको तथ्यांकअनुसार पनि सन् २०२३ देखि २०२४ सम्म हिंसात्मक अपराध ३५ प्रतिशतले घटेको थियो र सन् २०२५ मा पनि यो गिरावट जारी रहेको देखिन्छ।

ट्रम्पको यो निर्णय हालै पूर्व सरकारी कर्मचारी एड्वर्ड कोरिस्टिनमाथि भएको आक्रमणपछि आएको हो। उनले राजधानीमा बढ्दो हिंसालाई ‘आपतकालीन अवस्था’ घोषणा गर्दै नेशनल गार्ड तैनाथ गर्ने कार्यादेश जारी गरेका छन्। अमेरिकी रक्षा मन्त्री पिट हेगसेथका अनुसार, सैनिकहरू यसै साता डीसीमा आइपुग्नेछन्। ती सैनिकहरूले खुल्ला रूपमा हतियार नबोके पनि आवश्यक परे प्रयोग गर्न सक्नेछन्। यद्यपि, मेयर बाउजरले संघीय सैनिक तैनाथ गर्नुको सट्टा अभियोजनकर्ताका लागि थप बजेट दिनु प्रभावकारी हुने तर्क गरेकी छन्।