चीनको चांगन अटोमोबाइल कम्पनी र ईह्याङ को सहकार्यमा निर्मित, यो उड्ने कार ‘दिपल’ उपब्रान्ड अन्तर्गत पर्छ। नेपालमा यसलाई एमएडब्लू वृद्धि अटो कर्प प्रा.लि. ले तातोपानी नाका हुँदै ल्याएको हो। यो पूर्णतः विद्युतीय प्रणालीमा आधारित छ र दुई सिट क्षमताको छ। एक पटकको फुल चार्जमा यसले करिब ३० किलोमिटरको उडान भर्न सक्छ भने यसको अधिकतम गति १३० किलोमिटर प्रतिघण्टा रहेको छ।

उड्ने कारमा मल्टी–प्यारासुट सुरक्षा प्रणाली जडान गरिएको छ, जसले आकस्मिक अवस्थामा यात्रुको सुरक्षा सुनिश्चित गर्छ। यद्यपि, यो कार नेपालमा हाल प्रदर्शनीका लागि मात्र ल्याइएको हो। यसको सञ्चालन अनुमति नभएको र मूल्य पनि तोकिएको छैन। छिमेकी मुलुक चीनमा यसको मूल्य झन्डै रु. २ करोड बराबर पर्ने बताइएको छ। अमेरिका, चीन, कोरिया र यूएई लगायतका देशहरूमा यस्ता कारको परीक्षण उडान भइसकेको छ।

नाडाले यस्तो अत्याधुनिक प्रविधि नेपालमा प्रदर्शन गरेर नेपाली अटोमोबाइल बजारलाई नयाँ दिशा दिने प्रयास गरेको छ। यस प्रदर्शनीले भविष्यमा नेपालमा पनि यस्ता प्रविधिहरू भित्रिने सम्भावनाको ढोका खोलेको छ।