बेसेन्टले मंगलबार दिएको एक अन्तर्वार्तामा रुस–युक्रेन युद्ध सुरु भएपछि चीनले रुसबाट तेल आयातमा मात्र ३% वृद्धि गरेको छ भने भारतले ४०% भन्दा बढीले बढाएको दाबी गरेका छन्। उनले भारतले यस व्यापारबाट अतिरिक्त १६ अर्ब डलर नाफा कमाएको र यो लाभ भारतका केही धनी परिवारहरूमा मात्र सीमित रहेको आरोप लगाए। उनले भारतको यस व्यापारिक अभ्यासलाई “पूर्ण रूपमा अस्वीकार्य” भनेका छन्।

यसैबीच, ट्रम्प प्रशासनले रुसी तेल खरिदका कारण भारतमाथि प्रतिबन्ध लगाउन सुरु गरेको छ। अगस्ट २७ देखि लागू हुने गरी अमेरिकामा आयात हुने भारतीय सामानमा २५% अतिरिक्त भन्सार महसुल लाग्नेछ, जसले कुल महसुल ५०% पुग्नेछ।

बेसेन्टले चेतावनी दिँदै ट्रम्प र पुटिनबीचको वार्ता सफल नभए भारतमाथि थप प्रतिबन्ध लगाउन सकिने बताएका छन्। यसको जवाफमा भारतले अमेरिकी कदमलाई अनुचित भन्दै आफ्नो राष्ट्रिय हित र आर्थिक सुरक्षाका लागि आवश्यक सबै कदम चाल्ने घोषणा गरेको छ।