कर्जाका प्रमुख शीर्षक र नयाँ सीमाहरू:

• कृषि तथा पशुपन्छी कर्जा: यो कर्जाको सीमा बढाएर ५ करोड रुपैयाँसम्म पुर्‍याइएको छ। यसअघि व्यावसायिक कृषिमा मात्र सीमित यो सुविधा अब सबै प्रकारका कृषकले पाउनेछन्।
• महिला उद्यमशील कर्जा: महिला उद्यमीका लागि दिइने कर्जाको सीमा १५ लाखबाट बढाएर २५ लाख रुपैयाँ पुर्‍याइएको छ।
• विदेशबाट फर्केका युवाको स्वरोजगार कर्जा: विदेशबाट फर्किएका युवालाई दिइने स्वरोजगार कर्जाको सीमा १० लाखबाट बढाएर २० लाख रुपैयाँ पुगेको छ।
• अन्य कर्जा: शिक्षित युवा परियोजना कर्जा, दलित समुदायका लागि भगत सर्वजित उद्यम विकास कर्जा, स्टार्टअप उद्यम कर्जा र उद्योगमा बोइलर प्रतिस्थापन कर्जा सबैको सीमा २० देखि २५ लाख रुपैयाँसम्म पुर्‍याइएको छ।
• प्राकृतिक विपद् पीडित: प्राकृतिक विपद्का कारण घर गुमाएका पीडितहरूले अब निजी आवास निर्माणका लागि ५ लाख रुपैयाँसम्मको कर्जा पाउनेछन्। यो व्यवस्था यसअघि थिएन।

ब्याज अनुदानमा कटौती र नयाँ प्रावधान:

सरकारले सहुलियतपूर्ण कर्जामा दिइने ब्याज अनुदानको दर ३ प्रतिशतमा झारेको छ। यसअघि महिला उद्यमशील कर्जामा ६ प्रतिशत र अन्य शीर्षकमा ५ प्रतिशतसम्म अनुदान दिइँदै आएको थियो। यसका साथै, बैंकहरूले आधार दरमा थप्ने प्रिमियम दर पनि २ प्रतिशतबाट घटाएर १.५ प्रतिशत मा सीमित गरिएको छ।

संशोधित कार्यविधिअनुसार एक घरपरिवारका एक सदस्यले मात्रै यो कर्जा पाउनेछन्। कर्जा किस्ताबन्दीमा भुक्तानी गर्नुपर्नेछ र एक पटक स्वीकृत भएको सीमा पुन: बढाउन पाइने छैन। ब्याज अनुदान अधिकतम ५ वर्षसम्म मात्र प्राप्त गर्न सकिनेछ।

यो कार्यक्रम अब २०८७ असार मसान्तसम्म मात्र लागू हुनेछ। यसबाट परम्परागत सीप र पेशालाई आधुनिकीकरण गर्न तथा उद्यमशीलता बढाउन सहयोग पुग्ने विश्वास गरिएको छ।