काठमाडाैं, २६ असाेज । चीनको तिब्बतस्थित हिन्दूहरूको पवित्र तीर्थस्थल कैलाश मानसरोवर दर्शन गर्ने सिजन सकिएसँगै यो वर्ष हुम्लाको उत्तरी नाका हिल्सामा पर्यटन व्यवसाय फस्टाएको देखिएको छ। चिसो बढेर तापक्रम घटेपछि यस वर्षको कैलाश यात्रा औपचारिक रूपमा टुङ्गिएको छ।

विशेषगरी भारतीय तीर्थयात्रीहरूका लागि सबैभन्दा छोटो र सहज मार्गको रूपमा रहेको नेपालगञ्ज–सिमकोट हुँदै हिल्सा नाका भएर चीन जाने पर्यटकको सङ्ख्यामा कोभिड-१९ महामारीपछि उल्लेख्य वृद्धि भएको अधिकारीहरूले बताएका छन्।

होटल व्यवसायी मिम लामाका अनुसार यस सिजनमा हिल्सा क्षेत्रका होटलहरूले राम्रो आम्दानी गर्न सफल भएका छन्। उनले प्रत्येक होटलले एक करोड नेपाली रुपैयाँभन्दा बढी कमाइ गरेको जानकारी दिएका छन्।

जिल्ला प्रहरी कार्यालयका प्रहरी नायब उपरीक्षक (डीएसपी) शङ्कर पोखरेलले दिएको जानकारीअनुसार, वैशाखमा हिल्सा नाका खुलेदेखि हालसम्म करिब ६ हजार ५०० विदेशी पर्यटक हुम्ला भित्रिएका छन्। तीमध्ये करिब ६ हजार भारतीय तीर्थयात्री रहेका छन्, जो नेपालगञ्ज र सिमकोट हुँदै कैलाश दर्शनका लागि चीन प्रस्थान गरेका थिए।

डीएसपी पोखरेलका अनुसार भारतीयबाहेक अन्य देशका पर्यटक पनि यस छोटो र सुविधाजनक मार्ग प्रयोग गरी कैलाश मानसरोवर पुगेका थिए।

यस वर्ष तीर्थयात्रीको सङ्ख्या ह्वात्तै बढेपछि हुम्ला जिल्लाका सिमकोट र नाम्खा गाउँपालिकाले पनि स्थानीय तहको राजस्व सङ्कलन गरेका छन्। यात्रुलाई जिल्ला प्रवेश गरेबापत:

• भारतीय तीर्थयात्रीले प्रतिव्यक्ति ११ सय रुपैयाँ
• अन्य देशका नागरिकले प्रतिव्यक्ति १५ सय रुपैयाँ

शुल्क तिर्नुपर्ने व्यवस्था गरिएको अधिकारीहरूले बताएका छन्। चिसोका कारण याम सकिए पनि कैलाश यात्रुको आगमनले यस वर्ष स्थानीय पर्यटन र व्यापारमा उत्साह थपेको छ।