मन्त्रालयले दिएको जानकारीअनुसार, अधिकांश आक्रमणहरू उत्तरपूर्वी क्षेत्रहरू र होक्काइडो टापुमा भएका छन्। मृत्यु हुने सात जनामध्ये एक जना उत्तरपूर्वी प्रिफेक्चर इवातेका पुरुष थिए, जसको भालुले आक्रमण गरेको क्षतविक्षत शव अक्टोबर ८ मा फेला परेको थियो।

नयाँ कानून प्रयोग गरी भालु मारियो

यसैबीच, मियागी प्रिफेक्चरको सेन्दाईस्थित एक आवासीय क्षेत्रमा बुधबार एक वयस्क भाले भालुलाई गोली हानी मारिएको छ। बस्तीमा खतरनाक जनावरलाई ‘आपत्कालीन गोली प्रहार’ गर्न अधिकार दिने वन्यजन्तु संरक्षण तथा व्यवस्थापनसम्बन्धी संशोधित कानुन प्रयोग गरी भालु मारिएको यो पहिलो घटना हो।

घाइते हुनेको सङ्ख्या पनि उच्च

चालू आर्थिक वर्षको अप्रिलदेखि सेप्टेम्बरसम्मको अवधिमा भालुको आक्रमणबाट १०८ जना मानिसहरू घाइते भएका छन्, जुन ९९ वटा घटनासँग सम्बन्धित छन्। यो तथ्याङ्क पनि अहिलेसम्मकै सबैभन्दा खराब रहेको मन्त्रालयले जनाएको छ।

वातावरण मन्त्रालयका अधिकारीहरूले उत्तरपूर्वी क्षेत्रमा भालुको मुख्य खाद्यवस्तु बिच नट (Beech Nuts) कम उत्पादन हुने सम्भावना रहेकाले थप भालुहरू आहाराको खोजीमा आवासीय क्षेत्रमा पस्न सक्ने चेतावनी दिएका छन्। त्यसैले सर्वसाधारणलाई सतर्क रहन आग्रह गरिएको छ।