काठमाडाैं, ५ कार्तिक । संयुक्त राष्ट्रसंघ (UN) ले बजेटको दबाबका कारण द्वन्द्वग्रस्त मुलुकहरूमा खटिएका शान्ति सैनिकको सङ्ख्यामा २५ प्रतिशतसम्म कटौती गर्ने भएको छ। यद्यपि, कटौतीपश्चात् पनि शान्ति सैनिकमा प्रमुख योगदानकर्ता राष्ट्रहरूको सूचीमा नेपालको अग्रणी स्थान कायमै रहने भएको छ।

हाल विश्वभरका १४ वटा राष्ट्रसंघीय मिसनहरूमा १२० भन्दा बढी राष्ट्रका १ लाख २० हजारभन्दा बढी शान्ति सैनिकहरू कार्यरत छन्। नेपालले अहिले १० वटा मिसनमा ५,८१९ जना सुरक्षाकर्मी खटाएको छ, जसमा ५३८ जना सैन्य टोली छन्।

नेपालको प्रतिबद्धता र विश्वव्यापी पहिचान

राष्ट्रसंघले समानुपातिक रूपमा कटौती गरे पनि नेपालको स्थान उच्च योगदानकर्ताको सूचीमा रहनेछ। नेपालले राष्ट्रसंघको आह्वानमा आवश्यक परेको खण्डमा १०,००० जनासम्म सैनिक पठाउन सक्ने आफ्नो प्रतिबद्धता दोहोर्याएको छ।

नेपाली शान्ति सैनिकहरू विश्वव्यापी रूपमा आफ्नो अनुशासन, साहस र व्यावसायिकताका लागि परिचित छन्। नेपालको तर्फबाट हालसम्म १ लाख ५९ हजार ६६४ जना सैनिकहरूले राष्ट्रसंघीय मिसनहरूमा योगदान गरिसकेका छन् र उनीहरूले सोही सङ्ख्यामा राष्ट्रसंघीय पदक पनि प्राप्त गरेका छन्।

यी मिसनहरूका क्रममा ७४ जना नेपाली सैनिकले वीरगति प्राप्त गरेका छन् भने ७५ जना गम्भीर रूपमा घाइते भएका छन्।

कूटनीतिक र आर्थिक महत्व

नेपाली शान्ति सैनिकको सहभागिताले अन्तर्राष्ट्रिय शान्ति प्रयासमा योगदान पुर्‍याउनुका साथै कूटनीतिक सम्बन्धलाई बलियो बनाउन र राष्ट्रसंघबाट प्राप्त योगदानमार्फत देशका लागि विदेशी मुद्रा आर्जन गर्न पनि महत्वपूर्ण भूमिका खेल्दै आएको छ। राष्ट्रसंघको यस कटौतीले विदेशी मुद्रा आर्जनमा केही संकुचन आउन सक्ने अनुमान गरिएको छ।