काठमाडाैं, २ मंसिर । नेपालमा लामो समयदेखि आर्थिक समस्या लगायत विभिन्न कारणले बीमालेख नविकरण नगर्ने (व्यतित बीमालेख) बीमितको संख्यामा बढोत्तरी आएको छ। नेपाल बीमा प्राधिकरणको पछिल्लो तथ्याङ्क अनुसार सवा १२ लाखभन्दा बढी बीमितले पौने ३७ अर्ब रुपैयाँ बराबरको बीमालेख नविकरण गरेका छैनन्।

व्यतित बीमालेखको तथ्याङ्क (असोज मसान्त २०८२/८३)

नेपाल बीमा प्राधिकरणले सार्वजनिक गरेको चालु आर्थिक वर्ष २०८२–८३ को असोज मसान्तसम्मको तथ्याङ्कले बीमा क्षेत्रको चिन्ताजनक अवस्था देखाएको छ:

• बीमितको संख्या: असोज मसान्तसम्म १२ लाख २० हजार ५४८ जना बीमितले बीमालेख नविकरण गरेका छैनन्। यो संख्या गत वर्षको सोही अवधिको तुलनामा १.८६ प्रतिशतले बढी हो। (गत वर्ष: ११ लाख ९८ हजार २९५)

• होल्ड रकम: नविकरण नभई कम्पनीहरूमा हाल ३६ अर्ब ७८ करोड ६७ लाख रुपैयाँ बराबरको रकम होल्ड भएको छ।

• रकमको बढोत्तरी: यो रकम गत वर्षको असोज मसान्तसम्मको तुलनामा ४.८९ प्रतिशतले बढी हो। (गत वर्ष: ३५ अर्ब ७ करोड २० लाख रुपैयाँ)

बीमा विज्ञहरूका अनुसार बीमालेख नविकरण नहुने लहर बढ्नुमा मुख्यगरी निम्न कारणहरू जिम्मेवार छन्:

• अभिकर्ताको कमजोर सक्रियता: अभिकर्ताहरूको कमजोर सक्रियता र ग्राहकसँगको निरन्तर समन्वयको अभाव।

• आर्थिक समस्या: धेरै बीमितहरू आर्थिक समस्यामा परी प्रिमियम रकम बुझाउन नसक्दा पोलेसी नविकरणबाट बाहिरिनु।

• अपर्याप्त जानकारी: बीमा सरेन्डर सम्बन्धी पर्याप्त जानकारी नहुँदा पनि पुनः नवीकरण नहुने दर उच्च हुनु।

सरेन्डर रकममा भने गिरावट

बीमालेख नविकरण नगर्नेको संख्या बढे पनि बीमा सरेन्डर हुने रकम भने घटेको देखिएको छ।

समीक्षा अवधिमा २२ हजार ९९९ बीमितले सरेन्डर गरेका छन्, जसअनुसार सरेन्डर दर (बीमालेख संख्याको आधारमा) १८.०३ प्रतिशतले घटेको छ।