काठमाडाैं, ११ मंसिर । हङकङको ताई पो जिल्लामा रहेको एक हाउजिङ कम्प्लेक्समा बुधवार लागेको भीषण आगलागी अझै नियन्त्रणमा आउन सकेको छैन। यो आगलागीलाई दोस्रो विश्वयुद्ध यताकै सबैभन्दा घातक घटनाका रूपमा लिइएको छ।

स्थानीय समय अनुसार बुधवार दिउँसो २ बजेर ५१ मिनेटमा उक्त कम्प्लेक्समा आगलागी सुरु भएको थियो।

 मृत्यु र बेपत्ता हुनेको संख्या बढ्दै

यो समाचार तयार पार्दासम्म आगलागीमा परी ४४ जनाले ज्यान गुमाइसकेका छन्। यस कम्प्लेक्समा धेरैजसो वृद्ध बासिन्दाहरू बस्दै आएका थिए, जसका केही भवनहरू अझै पनि जलिरहेका छन्। आगलागीका कारण ४५ जनाको गम्भीर अवस्थामा उपचार भइरहेको छ भने २७९ जनाको अवस्था अझै अज्ञात रहेको बताइएको छ। उद्धारकर्मीहरूको टोली बेपत्ता भएका सयौँ मानिसहरूको खोजीमा जुटिरहेको छ।

‘लेभल–फाइभ अलार्म’ र गैरइरादतन हत्याको आरोप

हङकङको अग्निशमन सेवा विभागले यस आगलागीलाई ‘लेभल–फाइभ अलार्म’ घोषणा गरेको छ, जसले यो घटनाको गम्भीरतालाई दर्शाउँछ। प्रहरीले आगलागीसँग सम्बन्धित गैरइरादतन हत्या (Manslaughter) को आशंकामा तीन जनालाई पक्राउ गरेको छ। पक्राउ पर्नेहरूमा निर्माण कम्पनीका दुई निर्देशक र एक सल्लाहकार रहेका छन्। प्रहरीले उनीहरूमाथि गम्भीर लापरवाही गरेको आरोप लगाएको छ।