काठमाडाैं, १४ मंसिर । काठमाडौंको बाफलस्थित ज्ञानोदय माध्यमिक विद्यालयमा शनिबार पाकिस्तानका राजदूत अब्रार एच. हाश्मीले नयाँ कम्प्युटर ल्याब उद्घाटन गरी औपचारिक रूपमा हस्तान्तरण गरेका छन्। नयाँ ल्याबमा ४० नयाँ कम्प्युटर, नयाँ फर्निचर र सुधारिएको फ्लोरिङ राखिएको छ। यसलाई उच्च कक्षाका विद्यार्थीहरूलाई सूचना तथा सञ्चार प्रविधि (ICT) शिक्षा प्रदान गर्न प्रयोग गरिने छ।

विद्यालयको पुरानो कम्प्युटर ल्याब पुनः निर्माण पछि प्राथमिक कक्षाका लागि सारिएको छ, जसले प्रारम्भिक डिजिटल शिक्षा अझ सुदृढ पार्ने विश्वास गरिएको छ। पाकिस्तानी दूतावासका अनुसार, विद्यालयलाई पहिलो कम्प्युटर ल्याब २०१३ मा दान गरिएको थियो र विगत १२ वर्षदेखि विद्यार्थीहरूका लागि निरन्तर शिक्षणमा प्रयोग हुँदै आएको छ।

उद्घाटन अवसरमा राजदूत हाश्मीले विद्यार्थीहरूलाई सूचना तथा सञ्चार प्रविधि, कृत्रिम बुद्धिमत्ता, ई–कमर्स, नवप्रवर्तन र फिनटेक जस्ता उदीयमान क्षेत्रहरूमा अध्ययन र अन्वेषण गर्न उत्साहित गरे। विद्यार्थी र समुदायका नेताहरूले विद्यालयमा ‘नेपाल–पाकिस्तान मित्रता समाज’ स्थापना गर्ने घोषणाप्रति आफ्नो कृतज्ञता व्यक्त गरेका छन्। साथै, विद्यालयको संगीत र खेलकुद संघलाई समर्थन गर्ने पाकिस्तानी दूतावासको प्रतिबद्धतालाई पनि स्वागत गरिएको छ।