काठमाडौं ।   १३ औं साग  नेपालमा  हुने निर्णय भएको ४ वर्ष अघि अर्थात सन् २०१५ मा हो ।   पूर्वतयारीका लागि ४ वर्षको समय प्रयाप्त हो तर पूर्वतयारी नपुगेकै कारण कतिपय प्रतियोगितामा नेपालले पदक गुमाएको छ ।   उदाहरणका लागि  सुटिङ प्रतियोगितालाई लिन सकिन्छ ।  नेपाली खेलाडीले पेस्तोलको अभावमा  अभ्यास गर्न पाएनन् । अन्तिम समयमा पेस्तोलको व्यवस्था गरियो तर थ्रोत्रो पेस्तोल भएका कारण काम लागेन ।   रुँदै रुँदै बीचमै प्रतियोगिता छाड्नु पर्ने वाध्यतामा नेपाली खेलाडी परे ।

सुटिङमा मात्रै होइन धेरै विधामा यस्तै लापरवाही देखियो । साइकलिङ प्रतियोगितामा पनि नेपाली महिला खेलाडीले नयाँ साइकल पाएनन् । आफ्नै पुरानो साइकल लिएर सहभागी भएकी सोनी गुरुङले  मुलुकलाई स्वर्ण पदक  दिलाइन, तर उनले प्रतियोगिता जित्दा  कुन देशको हो भन्ने छुट्याउन  रेफ्रीलाई हम्मे हम्मे प-यो । किनकी अरु सबै देशका प्रतियोगीहरु आफ्नो देशको  नाम तथा झण्डा सहितको ट्रयाक सुटमा थिए तर   नेपाली प्रतियोगी सोनी गुरुङलाई भने यो सुविधा उपलव्ध भएन ।

आफ्नै पुरानो स्वीमिङ कष्टम लगाएर उनी साइकलिङ् प्रतियोगितामा सहभागी थिइन । आयोजक राष्ट्रले नै आफ्ना खेलाडीलाई  आफ्नो देशको नाम तथा झण्डा अंकिट ट्रयक सुट उपलव्ध  नगराएको यर्थाथता पत्याउन सुरुमा विदेशी रेफ्री तयार भएनन् ।  यसै गरी  पुरुष तर्फको पौडी प्रतियोगितामा कष्टमको व्यवस्था नगरिएका कारण एक  नेपाली प्रतियोगीले सोनी गुरुङले साइकलिङ प्रतियोगितामा भाग लिँदा लगाएको स्वीमिङ कष्टम मागेर भाग लिए ।
करिव ४ अर्ब रुपैंया  बजेट स्वाहा पार्न लागिएको यो सागमा  विदेशी  जजलाई दैनिक ५ हजार रुपैंया भत्ता र आवास तथा खानपिनको व्यवस्था गरियो भने  नेपाली जजलाई  भने दैनिक २ हजार रुपैंयामा टारियो ।  खाने तथा बस्ने व्यवस्था गरिएन ।  यता सागको बजेटबाटै सबै मन्त्रीलाई दौरा सुरुवाल, कोटको प्रवन्ध गरियो ।  अरबौं रुपैंया दुरुपयोग  भयो ।

पदक संख्यामा अहिले सम्मकै रेकर्ड तोडिएको भन्दै खेलकुद परिषद्ले आफ्नो भ्रष्टाचार ढाकछोप गर्ने प्रयास गरेको छ ।  सरसरर्ती हेर्ने हो भने  स्वर्ण पदकको रेकर्ड तोडिएको सत्य हो तर गहिराईबाट हेर्ने हो भने  सन् २००० मा सम्पन्न आठौं साफ  जतिको नतिजा  यस पटक प्राप्त भएको छैन ।

आठौं साफमा  १ सय ६ स्वर्णपदकमध्ये  ३१ वटा अर्थात ३० प्रतिशत भन्दा बढी स्वार्ण पदक नेपालले जितेको थियो ।  आसन्न १३ औं सागमा ३ सय २७ स्वर्ण पदक छन् । आठौं साफको रेकर्डलाई भेट्टाउन नेपालले यस पटक  कम्तिमा १ सय स्वर्ण पदक जित्नु पर्ने हुन्छ तर अहिले सम्म ४४ अर्थात  १३ प्रतिशत मात्रै स्वर्ण पदक जितेको छ । अब  नेपालले स्वर्ण पदकको संख्या उल्लेख्य थप्ने संभावना छैन ।  नेपालले जित्नसक्ने संभावना भएका प्रतियोगिताहरु अब धेरै छैनन् ।